Policia e Dibrës në bashkëpunim me Interpol Tiranën ka arrestuar ditën e sotme, administratorin e klubit të Korabot të Dibrës, Fehmi Meziu (Mëziu), 51 vjeç.
Gjykata e Apelit në Napoli, Itali, e ka dënuar këtë shtetas, me 13 vjet burgim, për veprat penale “Shfrytëzim prostitucioni” dhe “Organizatë kriminale’’. Interpol Tirana vijon bashkëpunimin me Interpol Romën, për ekstradimin e Mëziut drejt Italisë.
Por, kush është Fehmi Meziu (Mëziu)?
Mëziu është një emër i njohur në futbollin shqiptar, pasi prej vitesh së bashku me miqtë e tij investonte te klubi i futbollit Korabi në Peshkopi, madje duke ia dalë të ngjiste klubin edhe në Kategorinë Superiore gjatë sezonit 2016-17.
Përpara vitit 2016, ai mbante pozicionin e administratorit të klubit, teksa konsiderohej ndryshe si një president “pa letra”, kjo për shkak se aksionet e klubit zotëroheshin nga bashkia Dibër. Pas vitit 2016, Mëziu pati një konflikt me ish-kryebashkiakun e Dibrës,Shukri Xhelili, duke u dorëhequr nga drejtimi i klubit, për t’u rikthyer muaj më pas.
Në muajin Mars të vitit 2016 Fehmi Mëziu u sulmua me thikë nga dy persona në rrugën “Hoxha Tasim” në Tiranë, duke shpëtuar nga sulmi edhe pas ndërhyrjes së policisë. Dyshohej se motivi i krimit ishin borxhet e shumta monetare që u kishte Fehmi Mëziu.
Pas këtij viti, Mziu u rikthye sërish në krye të klubit dibran, madje duke qenë pranë ngjitjes së ekipit në Superligë në dy raste, por pa ia dalë me sukses. Edhe në sezonin që lamë pas, Korabi ishte vetëm një ndeshje larg Kategorisë Superiore, por nuk arriti dot të fitonte në ndeshjen e “play off-it” përballë Erzenit.
Vitet e fundit, Korabi ishte kthyer në një klub fitimprurës, me disa lojtarë që u shitën në klubin e Partizanit dhe jo vetëm. Përmendim këtu Xhuliano Skukën, sulmuesin e Kombëtares dhe Albers Kekon, i cili u transferua tani tek Partizani