Rraha brutale që familjarët e deputetit socialist Rrahman Rrahja ushtrojnë ndaj dy vëllezërve Bilbil dhe Jashar Maja janë kthyer në kryefjalë ditën e sotme, teksa Policia reagoi vetëm pas publikimit të pamjeve të rënda.
Gazetari i kronikës, Ferdinand Dervishi, tha se ngjarja është shumë e rëndë. Sipas tij, kur sheh pamjet e dhunës, të kujtohen veprimet e mafies siçiliane gjatë viteve 1980-1990.Ai zbuloi dhe skandalin me lëndë helmuese që lëshohen ndaj banorëve.
“Ngjarja shumë e rëndë. Ajo që pa një popull përmes kësaj videoje, është shumë e rëndë. Për ata që e njohin kriminalitetin, fotografia e një njeriu me pistoletë në këtë formë dhe ato shkopinjtë e bejsbollit të kujtohen vetëm mafien siçiliane në vite 80-90 asgjë tjetër, jemi në Fushë-Krujë dhe na shfaqen pamjet sikur aty po veproni mafia siciliane”, tha ai.
Ai thotë se gjithë kjo histori lidhet me biznesin e guroreve, pasi pothuajse gjysma e Shqipërisë furnizohet me pllaka guri dhe granil në Fushë-Krujë dhe fitimet janë shumë të larta. Ai zbuloi dhe skandalin me lëndë helmuese që lëshohen ndaj banorëve.
“Kjo tregon se ata janë ndjerë shumë të sigurt se çfarë bëjmë dhe si sillen atje dhe çfarë kanë arritur të bëjnë në Fushë Krujë. Gjithë kjo histori ka lidhje me biznesin e gurorëve në Fushë Krujë. Fushë-Krujë është vendi i vetëm që ka material ndërtimi, pllaka guri, granil në afërsi të Tiranës dhe Durrësit, që do të thotë se gjysma e Shqipërisë furnizohet aty”, theksoi ai.
Gazetari shtoi se këto skena që shohim sot në Fushë-Krujë tregon se pushteti vendor nuk ka funksionuar asnjëherë siç duhet. Referuar burimeve, gazetari tregoi edhe shkakun i cili ka çuar deri në përplasjen masive.
“Tregon se në pushtetin vendor nuk janë zgjedhur njerëzit e duhur. Shpërthimi bëhet me dinamit, dinamiti është lëndë kimike, Shpeshherë për të shmangur dinamitin që blihet, kanë përdorur sulucione artizanale, që kanë përdoru nitrat dhe kur bëhen shpërthime lëshon një pluhur të verdhë, që është shumë helmues për zonën. Guroret janë fitimprurëse në Krujë. Sipas burimeve, ka pasur një incident një ditë më përpara që janë konfliktuar me një punëtor të Rrajave. Kjo thuhet se ka sjell këtë ngjarjen që pamë, e cila është shumë e rëndë”, theksoi gazetari Dervishi.
Gazetari tregoi një tjetër episod, kur tha se shefi i Komisariatit të Fushë-Krujës është lënë vetëm në vendin e ngjarjes pasi nuk kanë shkuar ekspertët e fushës.
“Në këtë vend kemi të instaluar me breza anti-shtetin. Pikëpyetja e madhe është a ka shtet aty? A ka rend aty? Nuk ka dosje te vjetra, janë zhdukur. Ka shumë bashkëpunim të policisë me krimin, sidomos me kanabisin. Policia ka funksionuar kështu gjithmonë. Shefin i ri i komisariatit kishte 24 orë pasi është emëruar, që i ndodhi ngjarja dhe ai është lënë vetëm. Në burimet e mia ai është lënë vetëm, sepse nuk kanë ardhur ekspertët. Kjo është e frikshme. Ai ka për të dështuar aty nëse nuk ka mbështetje”, tha Dervishi.