Banorët e zonës së Urës së Kuçit që ndodhet midis Lushnjes dhe Dimalit, u ankuan në Fiks Fare . Një zonë strategjike që lidh rreth 20 fshatra me një popullsi prej 6000 banorësh. Ata iu drejtuan Fiksit pasi problemi i tyre i përbashkët ishte një stacion ndalese për autobusin.
Ata shprehen njëzëri të bëhet një xhep në rrugë, pasi ata presin autobusin e linjës vetëm gjysmë metri nga asfalti. Kjo sipas tyre ka sjell edhe shumë aksidente në këtë rrugë. ” Trajlerat kalojnë me 90 km/orë dhe për ne që presim në rrugë është e vështirë, pasi kanë ndodhur dhe aksidente. Brenda muajit tre të tilla” shprehet një prej banorëve.
Pyetjes së gazetarit se nëse janë drejtuar diku në ndonjë institucion për këtë problem, ata shprehen se kanë berë tre kërkesa në Drejtorinë e Transporteve, në ministri dhe në Drejtorinë e Rrugëve, por përgjigje apo zgjidhje nuk kanë marrë.
Pasi dëgjoi kërkesën e banorëve Fiksi u interesua pranë DPSHTRR, ku specialisti Ardian Hasa shpjegoi se ndërhyet në rrugë duke u bazuar mbi një raport teknik dhe një raport audimi mbi sigurinë e rrugës për këtë segment vendqëndrimi. Raporti teknik bëhet nga ekspert të licencuar.
Ai shpjegoi se banorët duhet të dorëzonin një kërkesë dhe një peticion pranë DPSHTRR-së dhe këta të fundit negociojnë me ARRSh-në për problemin që kanë banorët. Pasi të bëhet ky hap do jetë më pas DPSHTRR-ja që do u vijë në ndihmë banorëve për të bërë të mundur plotësimin e kërkesës së tyre. Por edhe pse kjo do kohën e vetë, banorët nuk u vonuan në depozitimin e kërkesës dhe peticionit të tyre në DPSHTRR, me shpresën se gjërat do fillojnë të lëvizin./TCh
