Policia e Shtetit mohon raportimet e mediave iraniane se servera të sekuestruara gjatë aksionit më 20 Qershor në kampin e MEK u janë dorëzuar autoriteteve në Iran.
Në një njoftim zyrtar, Policia thotë se asnjë nga strukturat e saj hetimore dhe të Prokurorisë së Posaçme kundër Korrupsionit dhe Krimit të Organizuar, nuk ka patur kontakte me shtetin iranian apo me shtetas të këtij shteti.
“Të gjitha pajisjet e sekuestruara janë vendosur në dispozicion të strukturës përkatëse e cila do të kryejë ekspertimet digjitale, sipas procedurës ligjore. Asnjë nga pajisjet kompjuterike të sekuestruara dhe asnjë material i nxjerrë nga këto pajisje, nuk është dërguar jashtë territorit të Republikës së Shqipërisë”, thuhet në reagimin e bluve.
Më herët, mediat iraniane, duke cituar zyrtarë të këtij vendi, kanë raportuar se pajisje të sekuestruara në kampin e MEK nga policia shqiptare ndodhen tashmë në duart e zyrtarëve në Iran.
Forcat e policisë shqiptare hynë në kampin Ashraf-3, më 20 qershor në bazë të një vendimi të kërkuar nga SPAK dhe miratuar nga GJKKO. Dyshimet se anëtarët e MEK që strehohen në Manzë qëndrojnë pas sulmeve kibernetike ndaj institucioneve të Iranit dhe se janë përfshirë në aktivitete terroriste është argumenti që SPAK paraqiti në gjykatë, në kërkesën për kontroll në kampin “Arshaf 3”.
Ndërkohë, avokati i MEK, Genc Gjokutaj, ka deklaruar se më shumë se çështje ligjore, aksioni ishte çështje politike.
