Ish-ministri i Mjedisit, Lefter Koka ka marrë pjesë ditën e sotme për herë të parë në një seancë gjyqësore ndaj tij.
Ai është shfaqur në kafaz bashkë me ish-deputetin socialist, Alqi Bllako në seancën e sotme në GJKKO që ka nisur prej orës 9:00 dhe nëpërmjet avokatëve mbrojtës po lexohen konkluzionet përfundimtare për inceneratorin e Elbasanit.
Në këtë proces, janë në akuzë 10 ish-zyrtarë dhe dy kompani, me dyshimet për korrupsion aktiv, shpërdorim të detyrës dhe pastrimit të parave. Përveç Kokës dhe Bllakos, janë të pandehur Jonida Zeqo, Pëllumb Abeshi, Bardhul Çabiri, Serafin Papa, Mirel Mërtiri, Klodian Zoto, Stela Gugallja, dhe Etleva Kondi, si dhe 2 kompanitë shoqëria “Albtek Energy” sh.p.k dhe shoqëria “Integrated Technology Services” sh.p.k.
Lefter Koka u arrestua më 14 dhjetor me urdhër të SPAK. Ndaj tij janë 2 masa ‘arrest me burg’, për inceneratorin e Elbasanit dhe atë te Fierit. SPAK pretendon se Koka ka përfituar përmes ryshfetit 5 milionë eurosh për ndërtimin e 2 inceneratorëve.
SPAK ka kërkuar 10 vite burg për ish-ministrin që me aplikim të gjykimit të shkurtuar, nëse shpallet fajtor, do të dënohet 6.8 vite.
