Zëdhënësi i Policisë së Shtetit Gentian Mullai ka folur këtë të mërkurë mbi vrasjen e Klodian Rashës, ngjarje e ndodhur më 8 dhjetor të vitit 2020.
I ftuar në ‘Newsroom”, në Dosja.al Mullai u shpreh se policia raportoi një informacion të gabuar në atë periudhë.
Policia raportoi se arma gjetur në vendngjarje i përkiste Klodian Rashës, ndërkohë sot Mullai shprehet se ky informacion ishte i gabuar.
Sipas Mullait, gabimi i Policisë së Shtetit ishte se pronësinë e armës së gjetur në vendngjarje ia faturoi të ndjerit Rasha pa bërë verifikimet e nevojshme.
“Në lidhje me ngjarjen e rëndë ku humbi jetën Klodian Rasha, Policia e Shtetit ka dhënë 2 informacione. Informacionin paraprak në momentin që ka ndodhur ngjarja, 30 minuta më vonë, i mbledhur nga informacionet e para në vendngjarje si për çdo ngjarje tjetër. Informacion i mbledhur nga punonjësit e Policisë në vendngjarje. Punonjësit e Policisë na kanë thënë që ka ndodhur ‘kështu, kështu’ dhe ne kemi dhënë njoftim. Disa orë më vonë gjatë kqyrjes së vendit të ngjarjes është gjetur një armë zjarri. Policia ka dhënë një njoftim se është gjetur një armë zjarri. Të vetmin gabim që kemi bërë ne, është se arma i përkiste të ndjerit Klodian Rasha. Por ne e dhamë këtë informacion bazuar në informacionin paraprak që morëm nga punonjësi i Policisë,”- tha Mullai.
