Mjeku Ilir Alihmehmeti ka komentuar vendimin e qeverisë, e cila vendosi të mbajë peng diplomat e studentëve të mjekësisë për pesë vite, duke i detyruar këta të fundit të qëndrojnë në Shqipëri.
I ftuar në News 24, Alimehmeti është shprehur se qeveria po kërkon që të rikthejë punë me detyrim dhe se kjo është kundër parimit perëndimor të lëvizjes së lirë.
Ndër të tjera, Alihmehmeti është shprehur se objektivi kryesor i një shteti është mbajtja e mjekëve përmes mbështetjes së tyre dhe jo punësimit me detyrim që shkel të gjitha parimet bazë.
Alimehmeti: Qeveria po kërkon punë me detyrim. Kjo është kundër parimit perëndimor të lëvizjes së lirë. Po ashtu preket Karta e Bolonjës në lidhje me studimet, sepse tregu i punës nesër është Europa. Kjo do të thotë se ne kemi mundësi dhe shqiptarëve u duhet ofruar kujdes shëndetësor, por duke përmirësuar kushtet dhe jo me detyrim. Edhe sikur të realizohet kjo, lind një problem pasi punonjësi bën punën me detyrim. Po shkohet kundër parimeve që do e zgjidhnin këtë punë.
Mos të harrojmë se shteti nuk subvencionon vetëm studentin e mjekësisë me taksë. Kjo lloj logjike që paguajmë taksa për këtë shërbim dhe nuk mund të largohesh mund të përdoret për shumë aspekte. Që në 2018 ka një raport dhe thotë se problematikat mbeten të njëjtat, për të cilat nuk është bërë gjë.
