Qeveria shqiptare miratoi sot vendimin për t’i kaluar Gjykatës Kushtetuese në buxhet fondin 35 000 000 lekë, me qëllim rikonstruksionin e godinës së kësaj gjykate.
Sipas vendimit, Gjykatës Kushtetuese, në buxhetin e miratuar për vitin 2023, në zërin “Shpenzime kapitale”, të programit buxhetor “Veprimtaria gjyqësore kushtetuese”, i shtohet fondi prej 35 000 000 (tridhjetë e pesë milionë) lekësh (të reja), për rikonstruksionin e godinës së Gjykatës Kushtetuese. Efekti financiar do të përballohet nga fondi rezervë i buxhetit të shtetit i miratuar për vitin 2023, parashikon vendimi.
Vendimi i qeverisë vjen në mbështetje të Nenit 100 të Kushtetutës, bazuar në ligjin “Për menaxhimin e sistemit buxhetor në Republikën e Shqipërisë, të ndryshuar, dhe të ligjit “Për buxhetin e vitit 2023”, me propozimin e ministrit të Financave dhe Ekonomisë, hyn në fuqi menjëherë dhe botohet në “Fletoren zyrtare”.
Për realizimin e këtij vendimi, ngarkohen Gjykata Kushtetuese dhe Ministria e Financave dhe Ekonomisë.
