Këshilltarët e koalicionit “Bashkë Fitojmë” në bashkinë e Tiranës kërkojnë në gjykatën Administrative mbarimin e parakohshëm të mandatit të Erion Veliajt si kryebashkiak.
Në një kërkesë të depozituar në Gjykatën Administrative këtë të Mërkurë, ata argumentojnë në thelb se Erion Veliaj shkeli ligjin kur bëri betimin në tarracën e bashkisë dhe jo në sallën ku u zhvilluar mbledhja e këshillit bashkiak.
Për opozitën, me mënyrën sesi veproi, Veliaj konsumoi elementët e refuzimit të betimit.
Për këtë, i janë drejtuar gjykatës me kërkesën për “detyrimin e palës së paditur për kryerjen e veprimit administrativ Konstatimit dhe shpalljes së përfundimit para kohe të mandatit të Kryetarit të Bashkisë‘, si pasojë e refuzimit (mospranimit) të bërjes së betimit dhe mosmarrjes së mandatit si dhe të njoftimit të Këshillit të Ministrave nëpërmjet Prefektit‘“.
“Më 20 qershor të këtij viti u njoftua mbledhja e parë e këshillit bashkiak. Ajo që nuk funksionoi ishte pika më e rëndësishme ndoshta e rendit të ditës – shpallja e vlefshmërisë së mandatit të kryetarit të Bashkisë së Tiranës dhe procesi i betimit. Kushtetuta e ka të shprehur në mënyrë eksplicite që betimi është parakusht për fillimin e detyrës. Betimi edhe sipas ligjit për qeverisjen vendore, por edhe sipas detajimit shumë ekstrem që i bën reregulloja për organizimin dhe funksionimit e Këshillit Bashkiak, e ka shumë të parashikuat si formën e betimit ashtu edhe substancën ose thelbin e saj. Dhe mosrespektimi i njërës prej të dyjave e bën këtë proces të paligjshëm”, tha këshilltarja e “Bashkë Fitojmë” dhe juristja Silva Caka, në një prononcim për gazetarët jashtë ambienteve të gjykatës.
Ndërkohë, këshilltari tjetër i BF, avokati Genc Gjokutaj u shpreh se “ardhja jonë këtu ka të bëjë me faktin se Tirana s’ka kryetar bashkie në kuptim të ligjit pasi ai (Veliaj) nuk e ka bërë betimin aty dhe ashtu ku e kërkon ligji”.
“Në emër të banorëve të Tiranës dhe atyre që na kanë votuar ne kemi ndërmarrë këtë nismë ligjore për ti treguar Erion Veluaj se sot e tutje ai nuk mundet të mos njohë opozitën. Ai nuk mundet të mos njohë ligjin”, shtoi ai.
Erion Veliaj u konfirmua kryebashkiak i Tiranës në zgjedhjet lokale të 14 Majit, duke marrë rreth 58 mijë vota më shumë se rivali më i afërt Belind Këlliçi, i cili garoi nën logon e koalicionit “Bashkë Fitojmë”.
