Policia ka dhënë një informacion shtesë në lidhje me atentatin e regjistruar mesnatën e kaluar në fshatin Larushkë të Fushë Krujës, teksa ka saktësuar moshat e viktimave dhe të plagosurve.
Viktimë e atentatit ka mbeturt shtetasi Ramazan Sina, 29-vjeç dhe kanë mbetur të plagosur dy fëmijët e Gentjan Bejtjas, Alvi Bejtja, 13 vjeç dhe djali tjetër i tij, 10 vjeç.
Ramazan Sina është kunati i Gentjan Bejtjas, banesa ku ndodhi atentait. Ky i fundit dyshohet se ka qenë shënjestër e atentatit, por në momentin e ngjarjes kriminale, nuk ka qenë në banesë.
Policia gjithashtu bën me dije se ka ushtruar kontrolle në tre banesa si dhe kanë shoqëruar tre persona që mund të kenë dijeni për ngjarjen. Në përfundim të veprimeve hetimore në lidhje me ngjarjen, do të ketë një njoftim për shtyp në vijim.
13-vjeçari Alvi Bejtja ndodhet në gjendje të rëndë shëndetësore në reanimacion, ndërsa vëllai tjetër i tij, ka mbetur i plagosur lehtë.
Ramazan Sina dhe Alvi Bejtja u qëlluan me breshëri kallashnikovi në momentin kur po hynin në banesën e Gentjan Bejtjas, (babai i Alvit dhe kunati i Ramazanit), i cili dyshohet se ka qenë dhe shënjestra e atentatit.
Autorët janë afruar rreth 20 metra pranë banesës dhe kanë qëlluar me breshëri kallashnikovi, në momentin kur Ramazan Sina dhe Alvi Bejtja ndodheshin në ballkonin e katit të dytë të banesës.
Ngjarja ka ndodhur rreth orës 00:15 të mesnatës së kaluar. Dyshohet se kanë qenë 3 autorë, dy në rolin e qitësit dhe një në rolin e shoferit. Rreth 25 minuta pas ngjarjes kriminale, makina e autorëve tip “Volkswagen Golf 5” është gjetur e djegur në zonën e Lapidarit në Tapizë, bashkë me 3 kallashnikovë brenda. Mjeti ishte pa targa dhe është grabitur pak kohë më parë në Tiranë. Dyshohet se autorët janë ndihmuar dhe nga persona të tjerë për t’u larguar pas krimit.
