Deputetja e PD-së, Albana Vokshi i ka kërkuar llogari në Kuvend kreut të SPAK, Altin Dumani pse shumë çështje që janë kallëzuar prej vitesh në Prokurorinë e Posaçme, por nuk po marrin ende përgjigje.
Vokshi përmendi disa çështje si kryebashkiakun e Tiranës, Erion Veliajn, Teatrin Kombëtar, Inceneratorin e Tiranës, lidhjet me Ndragettan, koncesionet në shëndetësi, krimin elektoral, patronazhistin dhe përdorimin e të dhënave, e deri tek pse nuk ka nisur një hetim në lidhje me skandalin Rama-McGonigal.
Dumani deklaroi se nuk është e vërtetë që SPAK po vlerësohet vetëm në çështjet kundër krimit, por dhe ndaj korrupsionit. Ai deklaroi se disa çështje që përmendi Vokshi janë ende nën hetim, dhe se ndan të njëjtin mendim me të për disa çështje të mbartura, por ai tha se ka në dorë vetëm t’u krijojë kushtet për hetim prokurorëve.
“Vlerësime SPAK-u ka marrë edhe për luftën ndaj korrupsionit. Sa i takon çështjeve që iu përmendni, pjesa më e madhe e tyre janë nën hetim, ndaj të njëjtën mendim me ju për disa çëshrtje që janë të mbartura, dhe e kam ngritur si çështje që kur mora drejtimin e prokurorisë, por unë si drejtues prokurorie kam si detyrë që vetëm të krijoj kushtet që këto hetime të shkojnë përpara dhe më pas janë në dorën e prokurorëve. Shpresoj që në të ardhmen këto çështje të marrin përgjigje. “ u shpreh Dumani.
