Gjokë Gurra, i cili u ekzekutua dje bashkë me të birin në malësinë e Shkodrës, dyshohet se bashkëpunonte me policinë, duke i dhënë informacione për kultivimin e kanabisit. Një hakmarrje e mundshme për këtë veprimtari është një prej pistave që po hetohet nga grupi hetimor.
Gjokë Gurra, 57 vjeç dhe djali i tij Eduart Gurra, 31 vjeç janë viktimat e atentatit në fshatin Bruçaj të njësisë Pult në Dukagjin.
Vrasja
Të dy po shkonin me fuoristradën e tyre drejt shtëpisë së djegur në Dukagjin dy ditë më parë. Ende pa mbërritur tek banesa e shkrumbuar disa persona i kanë zënë pritë dhe i kanë qëlluar me armë zjarri duke i lënë të vdekur në vend brenda automjetit.
Ngjarja ka ndodhur tek një kthesë në një zonë të pyllëzuar, afro 500 metër pa mbërritur tek banesa e djegur e Gjokë dhe Eduart Gurrës. Mendohet se autorët i kanë zënë pritë pasi kanë pasur informacionin e saktë se dy viktimat po shkonin drejt banesës së tyre të djegur. Aty, i kanë qëlluar me breshëri plumbash duke i lënë të vdekur. Më pas, janë larguar në drejtim të paditur nga autoritetet hetimore.
Pistat e hetimit
Një prej pistave kryesore të këtij hetimi lidhet me dhënien e informacionit të Gjokë Gurrës për policinë në aksionet për asgjësimin e kanabisit në zonën e Dukagjinit. Gjokë Gurra, para afro 20 vitesh ka qenë efektiv policie. 57-vjeçari, i cili ishte dhe kryeplak i fshatit Bruçaj, dyshohet se herë pas here ka informuar policinë e Shkodrës lidhur me parcelat e kultivuara me kanabis sativa në Dukagjin. Kjo mbetet ende një pistë hetimi e pakonfirmuar zyrtarisht.
Një tjetër pistë ku është përqendruar hetimi janë edhe konfliktet lidhur me biznesin e lëndëve drusore ku babë e birë që mbetën të vrarë punonin prej vitesh duke i transportuar nga Dukagjini drejt Shkodrës. Megjithatë, kjo pistë mbetet deri më tani më pak e besueshme për grupin hetimor.
Ndërkohë nuk përjashtohen edhe konflikte të tjera që Gjokë Gurra dhe djali i tij mund të kenë pasur me persona të ndryshëm. 57-vjeçari ishte edhe pronar i një lokali në afërsi të drejtorisë vendore të policisë Shkodër, ku edhe banonte prej vitesh.
Zbardhja e krimit mbetet e vështirë për shkak se forcat e policisë kanë mbërritur pas 2-3 orësh në vendngjarje pasi rruga është e amortizuar në një terren të vështirë malor, çka i ka favorizuar autorët që të kryejnë vrasjen dhe të largohen në drejtim të paditur.
