Kurban Bajrami është një nga dy festat islame të cilën e kremtojnë myslimanët në mbarë botën, tjetri është Fitër Bajrami.
Bajrami është festuar nga besimtarët myslimanë në gjithë Shqipërinë. Mëngjesin e sotëm qindra besimtarë muslimanë nga qytete të ndryshme të vendit kanë shkuar në sheshe dhe xhami për të falur namazin.
Më poshtë ju sjellim detaje nga festimet në disa qytete në vend.
Festimet në Fier
Besimtarët myslimanë Fierakë kanë festuar Kurban Bajramin. Ndryshe nga çdo vit tjetër, këtë herë falja është bërë në sheshin qendror të qytetit, i mbushur nga qindra qytetarë, ndërsa krerët e Myftinisë së Fierit kanë përcjellë urimet për paqe dhe harmoni mes njerëzve. Kurban Bajrami u fal në orën 06:00 minuta. Ceremonisë së faljes i parapriu me fjalën e tij myftiu i Fierit Mikel Hazizolli, i cili përcolli mesazhin për më shumë paqe, mirësi, respekt e dashuri ndaj njeri-tjetrit dhe sidomos për më tepër besim, duke e konsideruar njeriun si pasurinë më të madhe të krijuar nga Zoti. Sipas tij kjo është festa e të gjithëve, për të kaluar më shumë kohë me familjen, fëmijët, të afërmit e fqinjët.
Festimet në Korçë
Falet namazi i Kurban Bajramit në qytetin e Korçës. Besimtarët myslimane në qytetin e Korçës i janë drejtuar xhamisë së vjetër historike Iljaz Bej Mirahori për të falur namazin e Kurban Bajramit. Ceremonia filloi me ligjerata te mbajtura nga imamët dhe më pas programi vijoi me faljen e namazit të Kurban Bajramit. Ceremonia u mbyll me një lutje te përbashkët ku besimtarë të shumtë kanë shkëmbyer me njëri-tjetrin mesazhin e paqes, begatisë për çdo familje shqiptare.
Festimet në Berat
Besimtarët myslimanë në qytetin e Beratit kanë falur sot Kurban Bajramin. Falja e madhe është kryer në Pedonalen “Republika”, ku besimtarët janë falur për mirësi, shëndet dhe fat për familjet e tyre. Falja e namazit të Kurban Bajramit, e cila është ndjekur nga qindra besimtar beratas, ka filluar në orën 06:00 dhe është kryer nga Imami Ferben Durra. Ai ka thënë gjatë fjalës së tij se Bajrami është dita e sakrificës dhe sinqeritetit, është një ditë e veçantë ku të gjithë besimtarët duhet të ndihmojnë jetimët e njerëzit në nevojë dhe duhet të respektojnë njëri-tjetrin. Gjatë faljes së madhe, besimtarët mysliman beratas ju lutën Zotit për më shumë paqe, bekim dhe harmoni
