Ish-ministri i PD, Genc Pollo ka komentuar situatën në të cilën po gjendet sot Kosova, tha ndër të tjera se Serbia me qëndrimet e saj ka devijuar nga marrëveshja e Brukselit, por edhe autoritetet e Kosovës do të ishte më me vend të përqendroheshin tek Plani franko-gjerman, te marrëveshja e shkurtit si dhe t’i kushtonin më pak energji “targave”, komunave, kryebashkiakëve në zyra në komunat e veriut, demonstrimeve policore në veri e gjërave të ngjashme me këto.
“Nuk jemi në një situatë të mirë për palët, – tha fillimisht Pollo per syri tv – sepse praktikisht, Plani franko-gjerman që ishte rigjallërimi i përpjekjeve të ndërmjetësimit ka devijuar për faj të Serbisë dhe të provokimeve të saj , por do të ishte përgjegjësi e duhur e autoriteteve të Kosovës dhe shpresoj e gjithë klasës politike që të përqendroheshin tek thelbi i këtij propozimi që tashmë është pasqyruar në marrëveshjen e Brukselit, në shkurt , katër muaj më parë, thelbi i së cilës është jo njohja diplomatike, pra objektivi është pak më modest se ç’ka qënë më herët, por njohja de facto, njohja praktike midis Kosovës dhe Serbisë, njëlloj siç kanë bashkekzistuar Republika Federale Gjermane dhe Republika Demokratike Gjermane, një shtet i lirë e një shtet komunist gjatë Luftës së Ftohtë.
Dhe si duket ky është konsensusi ose ky është objetivi që mund të arrihet. Për këtë pala kosovare duhet të bëjë si koncesion, Asociacionin e Komunave me Shumicë Serbe dhe ky do të ishte nja pazar i mirë, një marrëveshje e mirë për Kosovën sepse heq një siklet shumë të madh nga vetja, nga kërcënimet e vazhdueshme dhe destabilizimi i vazhdueshëm që i jep fqinji verior.
Megjithatë, për fat të keq, Serbia duke mobilizuar dhe kërcënuar me ushtrinë, duke bërë bojkote, duke nxitur protesta të dhunshme, duke goditur KFOR-in, duke rrëmbyer policët e ka devijuar këtë nismë, por edhe nga ana e autoriteteve të Kosovës do të ishte më me vend të përqendroheshin tek Plani franko-gjerman, te marrëveshja e shkurtit si dhe t’i kushtonin më pak energji “targave”, komunave, kryebashkiakëve në zyra në komunat e veriut, demonstrimeve policore në veri e gjëra të ngjashme me këto,” tha Pollo.
