Njëzetë persona janë arrestuar deri më tani në kuadër të një aksioni anti-drogë të autoriteteve vendase në bashkëpunim me partnerët.
Operacioni u krye nga policia dhe SPAK në bashkëpunim me autoritetet italiane, përkatësisht me prokurorinë e Firences, si dhe Eurojust e Europol dhe agjenci të tjera ligjzbatuese. GJKKO ka lëshuar 21 masa sigurie me kërkesë të SPAK, nga të cilat 20 arrest me burg dhe 1 arrest në shtëpi. 20 janë ekzekutuar këtë të Martë, ndërsa një person është shpallur në kërkim ndërkombëtar. Gjatë 2 viteve hetimesh, janë dokumentuar një sërë episodesh të trafikimit të drogës, si ndaheshin rolet mes anëtarëve të grupit, mënyra si operonin dhe detaje të trjera.
Në një deklaratë për mediat, prokurori i SPAK Vladimir Mara tha se grupi sillte në Shqipëri hashash çokollatë nga Siria, heroinë nga Turqia si dhe kokainë nga vendet e origjinës.
“Janë dokumentuar episode të shumta ta trafikimit të lëndëve narkotike, nga Siria në Shqipëri, nga Turqia në Shqipëria, nga Shqipëria në Itali, nga Shqipëria në Maqedoninë e Veriut dhe nga Shqipëria në Greqi”, tha Mara.
Prokurori shtoi se akuzat e ngritura ndaj të dyshuarve janë ato të trafikimit të narkotikëve në kuadër të grupit të struktura kriminal. Ndaj njërit prej tyre është ngritur edhe akuza për pastrim parash.
Mes personave të ndalura është dhe një efektiv policisë i kufirit në Shkodër, Marash Gjoni, i cili bashkëpunonte me trafikantët. Ai akuzohet për korrupsion.
Mara bëri me dije se për të gjithë anëtaret e grupit ka nisur hetimi pasuror.
Droga transportohej me kamionë
Nga një verifikim në Qendrën Kombëtaretë Biznesit, rezulton se disa nga anëtarët e grupit, janë pronarë të kompanive që merren me transport kombëtar e ndërkombëtar pasagjerësh dhe mallrash.
Gjatë konferencës për mediat, prokurori Mara tha se “trafikimi bëhej me kamionë, mënyra ishte shumë e kamufluar me lëndën narkotike që futej në vende të posaçme të vështira të kapeshin dhe nga skanerat”.
Sekuestrimet
Një nga drejtuesit e grupit, sipas burimeve pranë SPAK, është Endrit Bakiu. Ky i fundit rezulton i arrestuar në vitin 9 Shkurt 2021. Asokohe, policia njoftoi se në mjetin tip “Porsche” që drejtohej nga Bakiu u gjetën 77 pako me marijuanë çokollatë, me peshë totale 30.64 kg. Po ashtu, blutë bënë me dije ai informohej nga një tjetër person për prezencën e policisë në rrugë, po ashtu i ndaluar. “Nga hetimet ka rezultuar se sasia e lëndës narkotike të kapur nuk është prodhuar në Shqipëri, por është trafikuar nga një vend tjetër”, njoftote policia në informacionin e shëprndarë për mediat lidhur me aksionin e koduar “Kritikal“.
Po ashtu, 15 kg heroinë është sekuestruar më 2 Qershor 2021 në Kakavijë. 17 kg heroinë janë sekuestruar më 26 Qershor 2021 në Shkodër. Më 3 Gusht të po këtij viti janë kapur 14.75 kg kokainë po në Shkodër. 67,5 kg kanabis janë sekuestruar më 12 Tetor 2021 në Maqedoninë e Veriut, ndërsa 21 kg kokainë janë sekuestruar më 16 Nëntor 2021 në Milano të Italisë.
Sipas autoriteteve, 10 persona janë arrestuar në flagrancë gjatë këtyre 8 aksioneve, ndërsa droga e sekuestruar llogaritet rreth 2.7 mln euro.
Ndërkohë, gjatë ekzekutimit të vendimit të gjykatës janë sekuestruar në cilësinë e provës materiale automjete, pajisje kompjuterike, aparate celular, si dhe vlera monetare.
Personat që preken nga masat e dhënga nga Gjykata:
- Endrit Bakiu
- Suko Pajo
- Artur Sulaj
- Arian Tola
- Fadjon Çami
- Viron Lekaj
- Artan Agalliu
- Shpëtim Pjeshka
- Jani Çavo
- Kudret Rustemaj
- Besnik Ruçi
- Pirro Çapi
- Jani Meçja
- Edmond Kabashi
- Tomi Hila
- Leonard Nergjoni
- Artin Kurti
- Astrit Miska
- Ervis Çvilo
- Mirash Gjoni
- Sonila Sula (arrest shtëpie)
