Një aksident me vdekje ka ndodhur mëngjesin e kësaj të Marte në Rrugën e Kombit, në aksin rrugor “Rubik-Fang”.
Mësohet se një autobus me drejtues një shtetas kosovar është përplasur me një biçikletë, e si pasojë ka humbur jetën drejtuesi i kësaj të fundit.
Viktima është identifikuar si N.P, 72 vjeç. Ndërkohë është arrestuar drejtuesi i autobusit, shtetasi E.R 60-vjeç.
“Rreth orës 09:30, në aksin rrugor “Rubik-Fang”, autobusi me drejtues shtetasin E. R., 60 vjeç, banues në Kosovë, me drejtim lëvizjeje “Morinë-Durrës”, ka përplasur një biçikletë me të cilën lëvizte shtetasi N. P., 72 vjeç, banues në fshatin Fang, Rubik. Si pasojë e përplasjes, shtetasi N. P. ka humbur jetën në vendngjarje, ndërsa nga autobusi nuk është dëmtuar asnjë pasagjer.
Drejtuesi i autobusit, shtetasi E. R. është shoqëruar në ambientet e Policisë, për kryerjen e veprimeve të mëtejshme procedurale”,- njofton policia.
Në vendin e ngjarjes ndodhen shërbimet e Policisë Rrugore të Njësisë për Sigurinë e Autostradës “Milot-Morinë”, dhe grupi hetimor vijon punën për përcaktimin e shkakut të këtij aksidenti
