Marrëveshja mes “Oversport” dhe Federatës Shqiptare të Futbollit ka zgjatur vetëm një vit, edhe pse kontrata vitin e kaluar u nënshkrua për tre vite për të drejtën e transmetimit të Kategorisë Superiore, Kupës së Shqipërisë, Kategorisë së Parë dhe Superkupës së Shqipërisë.
Në mënyrë të befasishme, FSHF njoftoi sot ndërprerjen e kontratës me “Oversport”, ku pretendon për shkelje dhe mospërmbushje të detyrimeve kontraktore në mënyrë të përsëritur. Po ashtu, në njoftim thuhet se FSHF do të nisë procedurat ligjore në lidhje me rivendosjen e dëmeve që ka shkaktuar shoqëria “Oversport” për mospërmbushjen e detyrimeve që përcaktonte kontrata e firmosur mes palëve në fillim të sezonit të kaluar.
“Federata Shqiptare e Futbollit bën me dije se ka ndërprerë kontratën me shoqërinë “Over Sport” që kishte fituar të drejtën e transmetimit televiziv të kampionateve “Abissnet Superiore” dhe Kategorisë së Parë, si edhe të Kupës së Shqipërisë e Superkupës së Shqipërisë. Ky vendim i FSHF-së ka ardhur pas shkeljeve dhe mospërmbushjes së detyrimeve kontraktore në mënyrë të përsëritur nga shoqëria “Over Sport”. Pavarësisht të gjitha përpjekjeve të FSHF-së për të rivendosur bashkëpunimin në një modul të arsyeshëm, “Over Sport” në mënyre të përsëritur shpërdoroi besimin e dhënë nga FSHF. FSHF e ndjen për detyrim ndaj tifozëve dhe konsumatorëve në përgjithësi, të bëjë me dije këtë lajm duke i garantuar se do të bëjë çdo përpjekje për të siguruar transmetim televiziv profesional dhe të ndershëm për aktivitetet e saj. Ndërkohë, Federata Shqiptare e Futbollit do të nisë procedurat ligjore në lidhje me rivendosjen e dëmeve që ka shkaktuar shoqëria në fjalë për mospërmbushjen e detyrimeve që përcaktonte kontrata e firmosur mes palëve në fillim të sezonit të kaluar.” – njofton FSHF.
Më pas, ka ardhur dhe një reagim nga “Oversport” ku deklaron se vendimi i marrë nga FSHF është rezultat i mungesës së transparencës në aktivitetet e saj. Ajo më tej flet edhe për presione nga ana e FSHF-së, që sipas saj, nuk janë në përputhje me parimet etike që një institucion i këtij niveli duhet të ndjekë.
“Oversport krejt papritur është përballur sot me lajmin e publikuar nga Federata Shqiptare e Futbollit në kanalet e saj zyrtare të komunikimit, për ndërprerjen e kontratës mes palëve, kontratë e cila ishte në fazë negociatash. Oversport shpreh shqetësimin se vendimi i marrë nga FSHF është rezultat i mungesës së transparencës në aktivitetet e saj, me presione që nuk janë në përputhje me parimet etike që një institucion i këtij niveli duhet të ndjekë. Oversport do të dalë me një deklaratë të plotë në vijim.” thuhet në deklaratën e shkurtër të “Oversport”.
Çfarë ndodhi një vit më parë?
Prej më shumë se një dekade ndeshjet e kampionatit shqiptar transmetoheshin në Supersport të platformës “DIGITALB”. Kjo kishte sjellë debate të shumta, por edhe kontestime nga ana e Autoritetit të Konkurencës, duke qenë se kreu i FSHF-së, Armando Duka zotëron 9.23 % të aksioneve në shoqërinë “DIGITALB”.
Edhe vitin e kaluar gara për shitjen e të drejtës televizive të Superiores, Kategorisë së Parë, Kupës së Shqiperisë dhe Superkupës së Shqipërisë u shty disa herë, dhe në media u aludua se shtyrja e garës u bë me qëllim për të shpallur fitues kompaninë “Super Sport” të shoqërisë “DIGITALB” ku ai është aksioner.
Në fund, Duka u dorëzua për faktin se kompania “Tibo” e cila është partnere e “OverSport”, ofroi 1.2 milionë euro, dyfishin më shumë se “DigitAlb”, për të blerë të drejtën televizive të ndeshjeve të kampionatit shqiptar, e cila ofroi vetëm 600 mijë euro. Pas nënshkrimit të kontratës, Armando Duka sërish mori merita për veten e tij, duke deklaruar se Kategoria Superiore ka dyfishuar të ardhurat nga e drejta e transmetimit televiziv, para që do u shpërndaheshin klubeve të Kategorisë Superiore.
Mbetet për t’u parë nëse dhe ndërprerja e kontratës këtë vit me “Oversport” është një “manipulim” nga ana e Armando Dukës, për t’ia dhënë sërish të drejtat televizive të transmetimit të kampionatit shqiptar kompanisë “Super Sport” të shoqërisë “DIGITALB” ku ai është aksioner.
