Gjykata e Posaçme ka rrëzuar kërkesën e Fredi Belerit për të marrë pjesë në betimin si kryebashkiak i Himarës. Ceremonia është caktuar që të kryhet ditën e martë (27 Qershor) ku do të konstituohet Këshilli i ri Bashkiak i Himarës, i dalë pas zgjedhjeve vendore të 14 Majit.
Në këto kushte të paprecedentë, mbetet e paqartë nga ana ligjore se çfarë do të ndodhë me mandatin e Fredi Belerit, ndërsa një sqarim pritet nga Komisioni Qendror i Zgjedhjeve.
Beleri ndodhet në qeli që prej datës 12 Maj ku akuzohet për korrupsion në zgjedhje, ndërsa arriti që në 14 Maj të mundë nga burgu kundërshtarin socialist Jorgo Goro (kryebashkiaku aktual i Himarës nga radhët e PS) me një rezultat të ngushtë.
Fredi Beleri ka kërkuar disa herë që të që të lirohet nga qelia, por kërkesat e tij janë rrëzuar nga gjykatat.
Beleri akuzohet nga prokuroria se ka dhënë para në këmbim të votave gjatë zgjedhjeve vendore të 14 Majit. Ai u ndalua së bashku me Pandeli Kokaveshin, i cili u lirua nga qelia pas problemeve shëndetësore.
Vetë Beleri ka mohuar akuzat. Avokati i rij e ka cilësuar arrestimin pa prova dhe të jashtëligjshëm. Sipas tij, i gjithë aksioni është një hakmarrje e kryeministrit Edi Rama ndaj Fredi Belerit.
Arrestimi i Belerit, i cili është përfaqësues i minoritetit grek në vendin tonë ka sjellë dhe reagimin e Athinës zyrtare që ka deklaruar se nëse prangosja e tij është bërë pa prova, atëherë kjo të përbënte një skandal. Ministria e Jashtme greke ka paralajmëruar pasoja për integrimin e Shqipërisë në BE nëse Beleri nuk lirohet.
