Dritan Dajti, i shpallur fajtor për vrasjen e katër efektivëve të policisë, vijon të përfitojë ulje dënimi nga gjykatat e vendit.
Apeli ka lënë në fuqi një vendim të mëparshëm të gjykatës së Elbasanit, që i uli me një vit dënimin Dritan Dajtit.
Çështja në apel u shqyrtua mbi bazën e ankimit të bërë nga Prokuroria. Këtë të Hënë, gjyqtari Genti Dokollari vendosi lënien në fuqi të vendimit të shkallës së parë, konfirmoi zyra e shtypit pranë Gjykatës së Apelit.
I njëjti gjyqtar, sqarohet më tej në njoftim, la në fuqi një vendim të marrë më 26.10.2022 po Gjykata e Elbasanit që i refuzoi një kërkesë Dritan Dajtit për ulje dënimi me 45 ditë. Këtë herë, ankimin kundër vendimit të shkallës së parë e bëri mbrojtja e të pandehurit.
Çështja e Dritan Dajtit u kthye në kryefjalë të diskutimit publik katër vite më parë kur tre gjyqtarë të ish-gjykatës së Apelit të Krimeve të Rënda vendosën që të shuanin dënimin me burg përjetë ndaj tij.
Dritan Dajti u dënua me burgim të përjetshëm nga Gjykata e Krimeve të Rënda për vrasjen e katër punonjësve të policisë dhe ndodhej në qeli prej masakrës së vitit 2009. Megjithatë, 10 vite më pas, më 8 shkurt 2019, një trupë gjyqësore e komanduar pranë Apelit vendosi të shuante burgimin e përjetshëm për Dajtin, duke e dënuar atë me 25 vjet burg. Gjykata pranoi kërkesën e Dajtit për gjykim të shkurtuar; çka solli uljen e 1/3 së dënimit.
Një hetim nisi nga ish-prokuroria e Krimeve të Rënda për dyshimet se trupa gjykuese që vendosi në favor të shuarjes së dënimit me burg përjetë mund të ishte korruptuar. Megjithatë, çështja ndaj tyre u pushua më vonë në tetor 2020 nga Gjykata e Posaçme, me kërkesë të SPAK. Dy prej gjyqtarëve janë shkarkuar më pas nga organet e vetingut, i treti dha dorëheqjen para procesit.
Çështja e shuarjes së dënimit me burg përjetë për Dajtin u kthye gjithashtu në lajtmotiv edhe në debatin politik me opozitën që akuzonte kryeministrin Edi Rama se kishte gisht në këtë vendin. Rama nga ana tjetër, bashkë me disa ministra të qeverisë hodhën akuza direkt ndaj gjyqtarëve që dhanë vendimin.
Vrasja e katërfishtë ndodhi në 7 gusht 2009 rreth orës 13.50 në lagjen nr.13, Plazh, Durrës pranë pistës së vogël “Iliria”. Asokohe u vrarë me armë zjarri punonjësit e policisë Fatos Xhani, Altin Dizdari, Sajmir Duçkollari, Kastrio Feskaj dhe shtetasi Ledjon Mara, si dhe janë plagosur vetë Dritan Dajti dhe Fatjon Shamku. Oficerët e policisë ishin në operacion për arrestimin e Dajtit, i cili ishte në arrati që nga viti 2004 kur u arratis nga ambientet e Gjykatës së Rrethit Gjyqësor Tiranë kur po gjykohej për vrasjen e biznesmenit Agim Beqo në vitin 1999. Vetë Dajti mbeti i plagosur gjatë shkëmbimit të zjarrit të grupit me të cilin shoqërohej dhe policisë.
