Ministri i Brendshëm i Kosovës, Xhelal Zveçla ka deklaruar se Policia ka parandaluar një sulm terrorist në Zveçan. Në postimin e tij të bërë ‘Facebook’, Zveçla shkruan se në një makinë me targa serbe janë zbuluar eksplozivë, armë ushtarake dhe sasi të konsiderueshme municioni ushtarak që sipas tij do të përdoreshin për sulm terrorist ndaj qytetarëve të vendit.
Makina me targa serbe është gjetur ndaluar nga Policia rreth 100 metra larg Komunës së Zveçanit në veri të Kosovës, ku prej javësh ka një situatë të tensionuar. Ministri thekson se gjithë këto armatime do të përdoreshin për të kryer sulme terroriste ndaj qytetarëve dhe institucioneve të Kosovës.
“Policia e Kosovës parandalon sulm terrorist. Falë angazhimit intensiv të njësiteve të specializuara të Policisë së Kosovës dhe informatave/inteligjencës së pranuar, sot është identifikuar një veturë me targa të Beogradit, rreth 100m larg Komunës së Zvecanit, në të cilën janë zbuluar sasi të mëdha të armatimeve, mjeteve eksplozive dhe municioneve të ndryshme, përfshi Zolla, Osa, eksplozivë, armë automatike, sasi e konsiderueshme e municionit, shok-bomba, uniforma dhe çanta ushtarake. Të gjitha këto mjete kishin për qëllim dhe shërbejnë për realizim të sulmeve terroriste ndaj qytetarëve dhe Institucioneve të Republikës së Kosovës”, shkruan Sveçla.
Zbulimi i kësaj makine me municione, sipas Sveçlës vërteton edhe deklaratat e tyre se gjatë javëve të fundit në Kosovë janë futur nga territori i Serbisë makina dhe automjete të tjera me armatime ushtarake.
Kjo është edhe një dëshmi e radhës që Serbia përmes grupeve dhe organizimeve të tilla synon të destabilizojë vendin tonë. Policia e Kosovës bashkë me të gjitha organet tjera të sigurisë vazhdojnë angazhimet e tyre në parandalimit e çdo akti të mundshëm që synon cenimin e sigurisë së vendit tonë. Ky rast konfirmon informacionet e pranuara nga Institucionet e sigurisë së Republikës së Kosovës se gjatë javëve të fundit nga territori i Serbisë janë futur në Kosovë vetura dhe automjete të tjera me armatime ushtarake.
