Ministri i Punëve të Brendshme në Serbi, Bratislav Gashiç tha të mërkurën se autoritetet serbe ‘e dinë saktësisht’ se kush e vrau Oliver Ivanoviçin, një politikan serb nga veriu i Kosovës.
‘Ne e dimë saktësisht se kush është vrasësi’, tha Gashiç, duke iu drejtuar deputetëve në një seancë të Kuvendit të Serbisë, ku po diskutohet për largimin e tij me kërkesë të opozitës.
Siç raportojnë mediat në Serbi, Gashiç tha se policia serbe e ka kërkuar atë njeri nga autoritetet gjermane ‘nën mbrojtjen e të cilës është’.
‘Kemi një video nga aeroporti i Tiranës, kemi fotografi nga Prishtina, kemi fotografi kur ka hyrë në banesë’, ka thënë Gashiç, pa treguar asnjë detaj tjetër, e as nuk ka dhënë prova të qarta për pretendimet që ka bërë.
Ai tha se ‘çështja është zbardhur ashtu siç e bëjnë profesionistët’, por se nuk kanë marrë pamje satelitore nga vendi i ngjarjes që kanë kërkuar nga partnerët ndërkombëtarë, me arsyetimin se ‘ka qenë me mjegull’.
Oliver Ivanoviç u vra më 16 janar 2018, me gjashtë të shtëna në shpinë, para objekteve të partisë së tij në Mitrovicën e Veriut në Kosovë.
Prokuroria Speciale e Kosovës deri më tani ka ngritur tri aktakuza për vrasjen e Ivanoviçit.
