Nga Boldnews.al
Kryetari në ikje i Bashkisë së Himarës, Jorgo Goro, ka vijuar të bëjë nderet e fundit ish-punonjësve, me të cilët ka pasur një “bashkëpunim” prej shumë vitesh. BoldNews.al ka investiguar dhjetëra procedura tenderuese nga kjo bashki, gjatë drejtimit të Goros, të cilat kanë shkuar për familjarët e ish-juristit të këtij institucioni, Elton Rondo.
Kësaj herë, 36 ditë pas zgjedhjeve dhe gjatë kohës që fituesi i 14 majit Fredi Beleri ndodhet në burg, Goro ka shpallur sërish firmën “Cogren” fituese të një tenderi, pavarësisht se s’kishte ofertën më të ulët. Një vendimmarrje tepër e dyshimtë, e cila njihet gjerësisht në Himarë se kjo dyshe ka përlarë procedurat më të majme të bashkisë. Madje, bërja në mënyrë të tillë të tenderëve sollën edhe rezultatin në zgjedhjet vendore të 14 majit, pasi paratë shkonin vetëm në një drejtim, duke e lënë Himarën gërmadhë. Pavarësisht se në atë bashki janë hedhur miliona.
Sipas dokumenteve, Bashkia e Himarës ka shpallur fituesin e tenderit “procedurë e hapur, punë” të objektit “rikonstruksion i rrugës në lagjen Grehot, Lukovë”. Loti i parë i këtij tenderi ka pasur një fond limit 25.000.000 lekë pa TVSH, me kohëzgjatje 6 muaj. Fituesi, firma “COGREN” ka pasur një ofertë me vlerë 20.685.680 lekë pa TVSH, ndërkohë që në tender ka pasur edhe oferta më të ulëta si e firmës “ASI-2A CO” me vlerë 19.000.000 lekë pa TVSH. Apo edhe oferta e firmës “NIKA” me vlerë 18.234.160 lekë pa TVSH.
Por, siç edhe e shikoni dhe lexoni në dokumente, të dyja firmat që ofruan më pak janë s’kualifikuar nga gara. Përkatësisht, firma “ASI-2A CO” u s’kualifikua për arsye se nuk plotëson aftësitë teknike dhe profesionale pasi ka procedura të tjera. Ndërkohë, firma “NIKA” u s’kualifikua “se oferta nuk është përputhje me të gjitha kërkesat dhe specifikimet”. Edhe kjo firmë ka kontrata të tjera! Dhe, kushtet i plotëson vetëm firma “COGREN”, e cila ka fituar para’ me thasë nga Bashkia e Himarës.
Lidhja e Goros së Himarës me ish-juristin: Tendera për ujësjellësa, pastrime, rrugë…
Denoncimet e BoldNews.al për firmën e familjarëve të ish-juristit të Bashkisë së Himarës
Por, çfarë ka fituar?! BoldNews.al ka denoncuar në vijimësi lidhjen e ngushtë Goro-Rondo. Vitin e kaluar u publikua investigimi me titull “Lidhja e Goros së Himarës me ish-juristin: Tendera për ujësjellësa, pastrime, rrugë…”. Redaksia shkruante se “… për çudi, apo për ndonjë aferë të mundshme kriminale, fitues i shumicës së këtyre tenderave është familja e ish-juristit Elton Rondo. Emri i z.Rondo është përmendur shpesh për lidhje të ngushta mes tij dhe Goros, aq sa paratë që duhet të shkonin për punë publike po shkojnë në xhepat e zyrtarëve apo ish-zyrtarëve. Disa punonjës të Bashkisë së Himarës, në kushte anonimati, kanë kontaktuar redaksinë e BoldNews.al, teksa kanë dhënë informacione për aferat Goro-Rondo”.
Në atë kohë ne publikuam dokumentet e një tjetër tenderi, i cili ka rënë në duart e familjes së ish-juristit Elton Rondo. Në fund të muajit gusht, Bashkia e Himarës ka shpallur fituese firmën “COGREN” për tenderin e ndërtimit të një parku në Borsh. Sipas dokumenteve, kjo firmë, në pronësi 100 % të Fotina Rondos, e ka shpallur fituese të procedurës “ndërtimi i kompleksit sportiv rajonal, Borsh”. Fondi limit ishte 40 000 000, ndërsa bashkimi i operatorëve ekonomikë “COGREN” & “A.E.K & Co” ofruan një vlerë prej 34.033.033 lekë.
Fotina Rondo, ka fituar tendera edhe gjatë kohës që djali i saj ka qenë jurist. Janë rreth 15 tendera që Fotina, me kompaninë COGREEN dhe ELEKRI, ka fituar në Himarë, duke ngritur hije të forta dyshimi se gjithçka ka qenë e paracaktuar, madje në konflikt të hapur interesi. Tenderët kanë qenë që nga ndërtimi i ujësjellësve, pastrimi, ndërtime rrugësh, këndë sportive etj, etj. Shumica e procedurave ka qenë pa garë!
