Policia e Shtetit ushtroi kontrolle ditën e sotme në kampin e MEK në Manzë të Durrësit, pasi dyshohet se anëtarët e opozitës iraniane që strehohen aty kryenin sulme kibernetike ndaj shteteve të tjera. Eksperti i kriminalistikës, Ervin Karamuço, i ftuar në emisionin ‘Repolitix’ në Report Tv, tha se anëtarët e kampit MEK kishin si objekt të sulmeve kibernetike qeverinë iraniane, ndërsa sipas tij deri më tani nuk flitet ende për shtete të tjera.
Karamuço u shpreh se kjo situatë ka qenë edhe temë diskutimi në mbledhjen e Këshillit të Sigurisë Kombëtar, që u thirr pak ditë më parë nga Presidenti Bajram Begaj.
“SPAK ka kompetencë në lidhje me vepra penale edhe në fushën e terrorizmit. Ka pasur dyshime për krime terroristë të lidhura me sulme. Ka qenë pushteti i Iranit që na kanë kërcënuar që nëse vazhdojnë sulmet kibernetike nga Shqipëria me bazë në Manzë. Ajo që kemi verifikuar edhe me institucione partnere, ka qenë se vërtetë në bazën e tyre dyshohet se mund të ketë një grup që organizon vepra të tilla jo vetëm për Shqipërinë, por edhe me interesa që mund të cenohen në mënyrë indirekte për shtetas shqiptar. Ka qenë kryefjalë edhe në Këshillin Kombëtar se ca do bëjmë. Çdo shtetas shqiptar ose i huaj me banim në territorin e republikë shqiptar, me banim të përkohshme ose të përhershëm janë pjesë të subjektit tonë penal dhe trajtohen njëlloj. Ndërhyrja e sotme vuri shinat e zbatimit të një vendim gjykate, të një procedure ligjore që ka në bazë edhe parandalimin e sulmeve të mëtejshme dhe për të vënë papërgjegjësi autorë që mund të kenë organizuar sulme edhe më parë. Është irani. Nuk jam në dijeni për shtete të tjera aktualisht”, tha ai.
