Akademiku Artan Fuga ka reaguar në lidhje me miratimin e projektligjit për zgjatjen e mandatit të Kryetarit të Akademisë së Shkencave nga Komisioni i Ligjeve.
Në një postim në rrjetet sociale, Fuga ka deklaruar se projektligji shkel 15 ligje në fuqi, duke mos përjashtuar edhe Kushtetutën e vendit.
Ai ka shtuar se tashmë çështja nuk ngelet më vetëm mbi personin që drejton Akandeminë, por shkon më thellë duke vënë në dyshim vullnetin e këtij komisioni për të zbatuar ligjet.
Reagimi
Akademiku Artan Fuga shkruan:
Sot komisioni i ligjeve i Kuvendit të Shqipërisë, pa marrë asnjë ekspertizë, pa thirrur asnjë palë të interesuar, miratoi projektligjin e Petro Koçit për zgjatjen e mandatit të Kryetarit të Akademisë së Shkencave në kundërshtim me ligjin në fuqi.
Unë njoftoj publikisht zonjën Lindita Nikolla, kryetare e Kuvendit, kryetaren e komisionit të ligjeve, kryeministrin Rama, deputetët, se unë vërtetoj se ai projektligj shkel me dy këmbët 15 ligje në fuqi, shkel 4 platforme ligjore, duke përfshirë edhe Kushtetutën e Shqiperisë.
Unë si qytetar vullnetarisht vihem në dispozicion të Kuvendit të Shqipërisë për ta vërtetuar këtë gjë!
Nuk është më çështja e kryetarit të Akademisë së Shkencave, kjo është një vogëlsirë, por çështja është a ka aftësi dhe vullnet komisioni i ligjeve të respektojë ligjet!
Pyetja që po shtrohet është : A jemi më një shoqëri që vepron në bazë të ligjeve? Situata që shoh është e frikshme!
Kalimthi, para se të bëj të njohur publikisht se ku shkelen rëndë ligjet, kujtoj :
Ka shoqëri ku ligji bëhet me vullnet të përgjithshem dhe quhet demokraci.
Ka shoqëri që ligjin e bëjnë pak veta, kundër popullit, por e zbatojnë. Kjo quhet diktaturë.
Ka shoqëri ku ligjin e bëjnë pakicat, por as ligjin që bëjnë vetë nuk e zbatojnë. Kjo quhet tirani.
A po shkojmë në tirani?
