Vijon të jetë alarmante situata në Shënavlash, të Durrësit, aty ku disa ditë më parë u dëmtua impianti i filtrimit të ujërave, e si rrjedhojë ujërat e zeza vërshuan në ambjent të hapur.
Prej ditësh banorët e zonës ndeshen me aromën dhe pamjen e pakëndshme para banesave të tyre. Në një prononcim për mediat ata ngrenë shqetësimin dhe shprehen se kjo situatë po jua bën jetesën më të vështirë.
“Na shqetëson aroma se të gjithë ujërat e zeza këtu vijnë. Miza, mushkonja, të gjitha të këqijat i kemi nga era e keqe”,-tha një banor.
Rrugët përkrah kanalit të ndotur janë të vetmet ku mund të kalojnë banorët, duke u kthyer kështu në një kërcënim serioz për shëndetin e tyre. Ndërkohë sipas banorëve edhe institucioni i bashkisë është në dijeni të rastit.
“Normale që e dinë, se kanë ardhur e kanë verifikuar edhe vetë. Ata kanë kaluar në këtë rrugë, e dijnë shumë mirë si vjen era, po ishalla u mbushet mendja e vënë dorë”,-tha një grua.
