Ekipet e shpëtimit kanë arritur ta nxjerrin në sipërfaqe automjetin tip “BMW” që ndodhej brenda lumit Lepenc në Maqedoninë e Veriut.
Brenda saj ndodheshe familja nga Kosova: Naim, Merita dhe Ermal Pacolli, të cilët fatkeqësisht, ndërruan jetë. Ndërsa, një tjetër familjar i tyre, i cili po udhëtonte me ta, fatmirësisht ka arritur të shpëtoj dhe aktualisht është duke u trajtuar në Spitalin “8 shtatori” në Shkup.
Në momentin kur “BMW-ja” është nxjerrë nga lumi Lepenc, brenda në të ndodheshin dhe tre viktimat, të dukshëm nga distanca, siç shihet dhe nga fotot e publikuara nga mediat vendase.
“Njoftojmë opinionin e gjerë se pas një pune intenzive ekipet e kërkim-shpëtimit nga Republika e Maqedonisë së Veriut dhe Republika e Kosovës kanë arritur ta lokalizojnë veturën në lumin Lepenc ku pas shumë përpjekjeve është arritur nxerrja e veturës, me trupat e pajetë në të. Ambasada e Kosovës në Shkup shpreh ngushëllimet e saja të thella për këtë tragjedi. Njëherit shprehim falenderim për të gjitha institucionet e përfshira në këtë rast”, njofton Ambasada e Kosovës në Maqedoninë e Veriut.
Aksidenti u regjistrua të shtunën rreth orës 15:20 në rrugën Shkup –VK Bllacë. Nga Ministria e Punëve të Brendshme e Maqedonisë së Veriut, njoftuan se në aksident ishin përfshirë vetura ‘Volkswagen Turan’ me targa të Shkupit i drejtuar nga B.B (64) nga Shkupi dhe një veturë të udhëtarëve ‘BMW’ me targa të Kosovës e drejtuar nga Naim Pacolli (60 vjeç) nga Kosova, e cila pas aksidentit ka rënë në lumin Lepenc.
Kërkimet për gjetjen e tre pasagjerëve të veturës BMW, kanë nisur pasditen e së shtunës, ku përveç ekipeve të shpëtimit të Maqedonisë së Veriut, në kërkime ndihmuan edhe pjesëtarët e Forcave Speciale të Kosovës dhe disa vullnetarë.
