Katër persona janë arrestuar nga policia e Durrës, që njofton se ka goditur një rast të ushtrimit të prostitucionit.
Në pranga u vunë Banush Kanani, 25 vjeç, banues në Fier, Xhuljano Kollçaku, 30 vjeç, banues në Kavajë, si dhe shtetësja L.T. 22 vjecce për veprat penale “Ushtrimi i prostitucionit” dhe “Shfrytëzimi i prostitucionit”, kryer në bashkëpunim.
Operacioni i koduar “Flower” nga policia dhe prokuroria e Durrësit erdhi pas katër muajsh hetime.
Hetimet
Sipas bluve, Kanani dhe Kollçaku, në bashkëpunim me njëri-tjetrin, shfrytëzonin për prostitucion shtetasen L. T., duke i siguruar asaj klientë të ndryshëm dhe hotele në qytetet e Durrësit, Kavajës, Lushnjes dhe Fierit, kundrejt pagesave që varionin nga 80-150 euro.
Gjithashtu, ata siguronin automjetet me të cilat transportonin 22-vjeçaren dhe merrnin personat që kishte kontaktuar ajo, me qëllim ushtrimin e prostitucionit në ambiente të ndryshme në qytetet e sipërpërmendura.
Gjatë kontrollit fizik, shtetases L.T. iu gjet një sasi me lëndë të dyshuar narkotike kokainë, e cila u sekuestrua në cilësinë e provës materiale.
“Në kuadër të operacionit është arrestuar edhe Endri Zeqiri, 24 vjeç, banues në Durrës, për veprën penale ‘Shfrytëzimi i prostitucionit’. Gjithashtu, në vijim të veprimeve u shpallën në kërkim shtetasit V. T. dhe M.V., për veprat penale Ushtrimi i prostitucionit’ dhe ‘Shfrytëzimi i prostitucionit’, kryer në bashkëpunim”, njoftoi policia.
Në cilësinë e provës materiale janë sekuestruar 5 celularë, 300 000 lekë, 200 euro dhe një automjet tip “Ford Fiesta”.
