Për Partinë Demokratike zgjedhja e Alfred Pezës drejtor i RTSH-së është antiligjore.
Në një deklaratë për mediat nga selia blu, deputetja demokrate Ina Zhupa thotë se marrja e këtij posti nga Peza është në kundërshtim me ligjin për mediat audiovizive.
“4 shkelje në 4 kushte: Drejtor i një media që s`duhet të ishte gjatë vitit të fundit. Pronar i nje media tjeter si “alpenews.al”. Anëtar i Partisë Socialiste, anëtar i Asamblesë, zëdhënës i dikurshëm dhe sekretar dixhital”, tha Zhupa.
Deklarata
Deputetja demokrate dha dhe interpretimin ligjor pse sipas saj, zgjedhja e Pezës drejtor i RTSH-së është në kundërshtim me ligjin.
Ajo shpjegoi se shkeljet lidhen me angazhimin e Pezës si deputetet i PS dhe në këtë forcë politike si dhe postet e mbajtura në mediat e tjera.
Zhupa tha:
Institucionet e pavarura, sidomos ato mediatike, kanë rëndësi jetike të qëndrojnë të tilla, siç i percakton ligji. Zgjedhja e Drejtorit të ri të RTSH, Alfred Peza, ish deputetit socialist milioner, shkel në mënyrë flagrante 4 kushtet e ligjit për papajtueshmërinë me pozicionin. Siç e paralajmërova në dëgjesën me Këshillin Drejtues tē RTSH në komisionin e medias, ishte paracaktuar nga kryeministri zgjedhja e Pezës, në mënyrën antiligjore, në krye të institucionit. Një garë false me miq e vartës së tij, pararendi shkeljen e ligjit me caktimin e tij si Drejtor.
Në ligj Nr. 97/2013 “PËR MEDIAT AUDIOVIZIVE NË REPUBLIKËN E SHQIPËRISË, në nenin 104, ku flitet për papajtueshmerite dhe konfliktin e interesave te Drejtorit te Pergjithshëm te RTSH-së, në pikën 1 (a) thuhet se:
Drejtori i Pergjithshem i RTSH-se nuk lejohet:
- A) të jetë anëtar i partive dhe shoqatave politike, kandidat per deputet apo te jete zgjedhur i tille në 2 legjislaturat e kaluara…
Alfred Peza ka qenë i zgjedhur deputet i Partisë Socialiste në periudhen 2013-2017, ç’ka në fakt korrespondon me faktin qe ka qene deputet ne nje nga dy legjislaturat e fundit. (2013-2017;2017-2021 janë dy legjislaturat e kaluara)
Gjithashtu Alfred Peza është edhe anëtar i Partisë Socialiste, ka qenë zëdhënës i partisë, i zgjedhur sekretar i saj dixhital dhe ne forumet drejtuese të saj, ç’ka është edhe një fakt tjetër qe bie ne papajtueshmeri me ligjin. Në datë 13.06.2023 ne kemi marrë informacion nga AKEP ku z.Peza rezulton ende person kontakti për Partinë Socialiste, edhe pas zgjedhjes.
Po i njejti nen vendos dy ndalesa të tjera, në pikën 1 (b) të tij, ku përsëri të dyja shkelen nga Alfred Peza.
- b) ose person që ka në pronësi pjesë kapitali apo aksione të shoqërive tregtare, si dhe të drejta të tjera në fushën e transmetimeve audiovizive, reklamës, prodhimeve të përmbajtjes së transmetimeve audiovizive, rrjeteve të komunikimit elektronik. Alfred Peza është pronar i një portali mediatik, sic e reklamon edhe vetë, alpeneës.al
Nënpika tjetër nënvizon…”ose persona të punësuar gjatë vitit të fundit, anëtarë të organeve drejtuese apo këshilluese të këtyre subjekteve apo të lidhur me ndonjë licencë me këto subjekte”. Alfred Peza deri ne 29 dhjetor 2022, pra 6 muaj më parë, ka qënë drejtor i grupit mediatik Panorama.
Pra 4 shkelje në 4 kushte
-Drejtor i një media që s`duhet të ishte gjatë vitit të fundit.
-Pronar i nje media tjeter si “alpeneës.al”.
-Anëtar i Partisë Socialiste, anëtar i Asamblesë, zëdhënës i dikurshëm dhe sekretar dixhital.
Ish-deputet i Partisë Socialiste.
Kjo është një zgjedhje në vazhdën e zgjedhjeve të Edi Ramës për të kapur institucionet e këtij vendi, për të kapur median, për të vendosur një “ERTV” 2, 3, 4 dhe për ta kthyer Radio Televizionin Shqiptar në një mekanizëm të punësimeve politike dhe për ta forcuar atë në kapjen politike.
Në jetën e mëparshme Alfred Peza ka qenë gazetar, por në dekadën e fundit ai ka qenë aktivist dhe funksionar i lartë i Partisë Socialiste. Për këtë shkak ai është zgjedhur në krye të RTSH nga Rama. Në mos ai u vu në krye të RTSH në kujtim të platformës së tij kur kandidonte për deputet në vitin 2013 dhe, në prani të Ramës, u premtoi qytetarëve të Peqinit binjakëzim të ekipit të qytetit me Lacion në Itali dhe një kanal sportiv të dedikuar “Shkumbini Channel”. Peza e mori kanalin e tij pas 10 vjetësh, por jo për peqinasit por për tekat politike të Ramës.
Për këtë kanë reaguar me shqetësim Reporterët Pa Kufi. Rrjeti “Safe Journalists” Përmes një letre drejtuar Autoritetit të Mediave Audiovizuale (AMA) shpreh shqetësim për historinë politike dhe çështjet ligjore të z. Peza.
Si anëtare e komisionit të medias do përdor çdo mekanizëm ligjor dhe çdo hapësirë parlamentare për ta kundërshtuar këtë kapje politike dhe shkelje të ligjit.
Si deputete e Partisë Demokratike u bëj thirrje monitoruesve të brendshëm dhe të jashtëm, organeve të respektimti të ligjit që të ngrenë zërin për këtë shkelje të hapur dhe të radhës të kryeministrit, i cili e ka kthyer ligjin në vend, siç e thotë vetë në ‘kinezëri’.
