Kosova nuk ka arritur dot të marrë fitoren përballë Rumanisë në stadiumin “Fadil Vokrri”, në sfidën e vlefshme për eliminatoret e Europianit Gjermani 2024.
Takimi u mbyll me rrjeta të paprekura, pavarësisht tentativave nga të dyja ekipet. Në minutën e ’69 “dardnët” festuan vetëm për pak minuta. I aktivizuar në fraksionin e dytë të lojës, Edon Zhegrova e dërgoi topin në rrjetë pas krosimit të Celinës, por ndërhyrja e sistemit VAR solli anulimin e golit për pozicion jashtë loje të Celinës.
Ky ishte barazimi i tretë në po kaq ndeshje për Kosovën në grupin I, teksa sfidën e radhës e ka përballë Bjellorusisë pas tre ditësh në transfertë. Aktualisht renditet në vendin e katërt me 3 pikë.
