Një trup i pajetë është gjetur ditën e sotme në Mat, në një kanal vaditës.
Policia bën më dije se trupi i përket shtetasit E.GJ, 25-vjeç i cili një ditë më parë u raportua i zhdukur nga familjarët. Këta të fundit kanë deklaruar se i riu kishte shkuar në pyll për të mbledhur kërpudha dhe nuk u kthye më.
Pas kërkimeve trupi i të riut është gjetur i pajetë në një kanal vaditës, ndërsa raportohet se në trup nuk kishte shenja dhune.
Njoftimi i policisë:
Shërbimet e Komisariatit të Policisë Mat, rreth orës 23.35, të mbremjes së djeshme, pas njoftimit të familjarëve, se shtetasi E.GJ., 25 vjeç, kishte shkuar në pyll, për të mbledhur kërpudha, dhe nuk ishte kthyer ende në banesë, kanë nisur menjëherë kërkimet në zonën e fshatit Shulbatër, për gjetjen e tij.
Pas disa orësh kërkime, në bashkëpunim me banorët e zonës dhe familjarët e tij, është bërë e mundur gjetja dhe nxjerrja nga shtrati i një kanali me ujë vaditës, i trupit të pajetë të shtetasit E. GJ., 25 vjeç.
Nga këqyrja paraprake, nuk janë konstatuar shenja dhune apo dëmtime të tjera.
Nga veprimet e para hetimore dyshohet se ky shtetas është mbytur aksidentalisht.
Grupi hetimor, në drejtimin e Prokurorisë, vijon punën hetimore për zbardhjen e plotë të rrethanave të kësaj ngjarjeje.
