Komisioni i Pavarur i Kualifikimit njoftoi të Enjten konfirmimin në detyrë të prokurores së Durrësit Elena Pelushi (Bakallbashi). Trupa e përbërë nga Valbona Sanxhaktari kryesuese, Firdes Shuli anëtare dhe Olsi Komici relator, vuri në dukje gjatë një seance të shkurtër dëgjimore se Pelushit nuk i ishin gjetur probleme.
KPK tha se kishte hetuar pasurinë e prokurores që për momentin shërbente si Inspektore pranë Inspektoratit të Lartë të Drejtësisë dhe nuk kishte gjetur problematika. Rezultat të njëjtë kishin hetimet edhe në kriteret e figurës dhe profesionalizmit. Elena Pelushi ka përfunduar në vitin 2002 Shkollën e Magjistraturës dhe ka punuar për gati dy dekada si prokurore e Prokurorisë së Durrësit. Në shkurt të vitit 2021, Pelushi u komandua pranë zyrës së Inspektorit të Lartë të Drejtësisë, ku punon si inspektore magjistrate.
Po ashtu, prokurorja Mirela Zavalani e Prokurorisë së Tiranës u konfirmua në detyrë nga Komisioni i Pavarur i Kualifikimit. Trupa e përbërë nga Olsi Komici, Xhensila Pine dhe Lulzim Hamitaj, vendosi pas një seance dëgjimore pa probleme të konfirmojë në detyrë Zavalanin.
Në rastin e prokurores së Prokurorisë së Tiranës, Mirela Zavalani gjetjet e hetimit administrativ të KPK-së, të bëra publike gjatë seancës dëgjimore të mbajtur të martën, u fokusuan kryesisht tek pasuria e vjehrrit të subjektit dhe ndarja e qirasë së paguar nga kunati – në një objekt në pronësi familjare, midis bashkëshortit të saj dhe të babait të tij. Mirela Zavalani e ka nisur karrierën në sistemin e drejtësisë në vitin 1999 si oficere e policisë gjyqësore. Ajo u emërua prokurore në vitin 2007 dhe ka punuar në Prokurorinë e Rrethit Lezhë deri në vitin 2012. Prej më shumë se një dekade, Zavalani e ushtron funksionin në Prokurorinë e Rrethit Tiranë.
