Rritja e çmimeve nuk i ka ndaluar strukturat hoteliere në Golem të vazhdojnë punën intensive, ndërsa vendas dhe të huaj, të ardhur kryesisht nga vendet e Europës, pushojnë.
“Paketat nuk kanë pasur ndonjë ndryshim të madh, por për shkak të rritjes së çmimeve është rritur diku te 10% oferta nga viti i shkuar. Ka pasur kërkesë më të madhe sesa vitin e shkuar, si nga agjencitë e huaja, po ashtu edhe nga diaspora e rajoni,” – u shpreh operatori turistik, Albulen Ndrepepaj.
“Çmimet janë super. 70 euro nata kemi paguar,” – tha një qytetare.
“Shumë mirë, çmimet normale. Për momentin jemi shumë të kënaqur. Në rregull janë të gjitha,” – u shpreh një qytetar.
“Mirë janë edhe çmimet. Në det kemi ardhur, me pushime. Mirë janë, s’kam vërejtje,” – tregoi një zonjë.
“Çmimet nuk janë të lira, por kjo është me dëshirë. Kush ka mundësi vjen, kush s’ka gjen më lirë,” – tha një tjetër.
Rritjen e çmimeve më shumë e ndjejnë vendasit.
“Unë i krahasoj me jashtë shtetit. Unë lëviz çdo vit dhe kur kthehem shoh që s’ja vlen të bësh pushime këtu,” – tha një qytetar.
“Ne jemi nga Polonia. Atje Shqipëria po bëhet gjithnjë e më shumë e pëlqyeshme për turizëm. Këtu moti është fantastik, detin e keni shumë të bukur dhe zona përreth tij duket që është në përmirësim të vazhdueshëm. Përgjithësisht është shumë mirë dhe ne jemi vërtetë të kënaqur,” – tregoi një turist.
Edhe problematikat a kërkesat nuk mungojnë.
“Rruga duhet të jetë më e mirë,” – tha një grua.
“Të ketë pak më shumë muzikë shqip, se më tepër po dëgjojmë italisht,” – u shpreh një tjetër.
Tur-operatorët thonë se edhe për këtë sezon veror kulmi i prurjeve të turistëve do të shënohet në muajt korrik-gusht, nisur edhe nga rezervimet./Euronews
