Ditën e sotme u emërua drejtori i ri i Radio Televizionit Shqiptar, në krye të së cilit u zgjodh Alfred Peza.
Lidhur me këtë ka reaguar deputetja e Partisë Demokratike, Ina Zhupa, e cila e ka quajtur emërimin e Pezës në krye të RTSH, shkelje ligji dhe kapje politike.
Përmes një postimi në rrjete sociale Zhupa ka përmendur ligjin Nr. 97/2013 për mediat audiovizive në të cilin thuhet se nuk lejohet të zgjidhet drejtor i përgjithshëm i një medieje një person që është anëtar i partive apo shoqatave politike.
Ndërkohë Alfred Peza është ish-deputet dhe anëtar i Partisë Socialiste.
Reagimi i Zhupës:
Siç e paralajmërova në dëgjesën me Këshillin Drejtues tē RTSH, ishte paracaktuar nga kryeministri zgjedhja e Pezës në mënyrën antiligjore në krye të institucionit.
Në ligj Nr. 97/2013 “PËR MEDIAT AUDIOVIZIVE NË REPUBLIKËN E SHQIPËRISË, në nenin 104 ku flitet për papajtueshmerite dhe konflikti i interesave te Drejtorit te Pergjithshëm te RTSH-së, në pikën 1 thuhet se:
Drejtori i Pergjithshem i RTSH-se nuk lejohet:
- a) të jetë anëtar i partive dhe shoqatave politike, kandidat per deputet apo te jete zgjedhur i tille në 2 legjislaturat e kaluara te, te kete konkurruar per kryetar te njësive vendore ne zgjedhjet e fundit të organizuara per to apo kanë ushtruar detyren e kryetarit te bashkisë, anëtarit te Keshillit te Ministrave apo te prefektit gjatë 3 viteve te fundit, si dhe ata qe jane anëtare te Keshillit të Ankesave, AKEP-it apo punonjes te ketij te fundit;
Alfred Peza ka qenë i zgjedhur deputet i Partisë Socialiste në periudhen 2013-2017, ç’ka në fakt korrespondon me faktin qe ka qene deputet ne nje nga dy legjislaturat e fundit. (2013-2017;2017-2021 janë dy legjislaturat e kaluara)
Gjithashtu Alfred Peza është edhe anëtar i Partisë Socialiste, ka qënë i zgjedhur sekretar i saj dixhital dhe ne forumet drejtuese të saj, ç’ka është edhe një fakt tjetër qe bie ne papajtueshmeri me ligjin.
Kapja e çdo institucioni publik të krijuar me ligj si të pavarur është modeli i një shteti parti që nuk funksionon si demokraci. Dënoj me ashpërsi shkeljen e ligjit dhe si anëtare e komisionit të medias do përdor çdo mekanizim kundra saj’.
