Manchester City mposht Interin në finale dhe shpallet kampion e Champions League për edicionin 2022/23.
Skuadra e Guardiolës ka fituar trofeun më të rëndësishëm europian për klube për herë të parë në histori, pasi triumfoi në finalen e Stambollit ndaj zikaltërve me shifrat 1-0 (Ataturk Stadium).
Të dyja skuadrat provuan të vinin në rrezik portën e kundërshtarëve brenda 20 minutave të para. I pari që tentoi ishte Bernardo Silva, ndërsa më pas Brozovic nuk pati shënjestrën e duhur.
Në minutën e 26-të të takimit u shfaq për herë të parë në këtë sfidë Erling Haaland. Sulmuesi norvegjez iu afrua golit me një të majtë të fortë, por gjeti menjëherë përgjigjet e portierit Onana.
Fati braktisi Kevin de Bruyne në fundin e pjesës së parë, teksa për shkak dëmtimi u detyrua të linte fushën e lojës.
Në të 60-tën, Citizens bëjnë një gafë në prapavijë, por Lautaro nuk përfitoi dot.
Kur nuk shënon, e pëson. Kështu ndodhi, pasi sfida u zhbllokua në minutën e 70-të me Rodrin.
Pavarësisht rasteve të italianëve në fund, shifrat mbeten të pandryshuara deri në fund. Manchester City kompleton tripletën, pasi kujtojmë që ka fituar FA Cup dhe Premier League.
Kështu pas rezultatit të sotëm, Pep Guardiola barazon Alex Ferguson me tre trofe brenda një sezoni pasi skuadra e tij kompletoi kryeveprën me Kupën e Kampioneve që e ngriti në qiellin turk edhe pse jo me futbollin spektakolar që na ka mësuar.
Zhgënjim për zikaltrit në një mbrëmje ku me pak fat mund të ishin ata që do të ngrinin trofeun pas 13 vitesh mungesë.
