Nga Boldnews.al
Albana Fico, drejtoresha e QSUT-së, dhe Nikolin Jaka, biznesmen dhe Kryetar i Dhomës së Tregtisë dhe Industrisë në Tiranë, po tentojnë që të shtojnë fondin e tenderit të ushqimeve të të sëmurëve. Një skemë e pastër e kësaj dyshe, që dyshohet se, para se të bëhen procedurat, fituesi dihet. Kompania e lidhur me biznesmenin, “KPL”, ka fituar edhe para disa viteve këtë procedurë, ndërsa ka dyshime të mëdha se edhe në 2023 do të jetë i njëjti fitues. Dhe, kur mësuan se s’kanë konkurencë, po tentojnë që të shtojnë fondin 7 milionë euro. Në fakt, nëse do të bëjmë një krahasim, tenderi i mëparshëm kishte një fond 7.4 milionë euro, pra një ulje me 400 mijë euro këtë vit. Pikërisht, këto “shtesa” mund të bëhen edhe në këtë procedurë, pavarësisht se ndaj QSUT-së ka pasur vazhdimisht kritika për vaktet ushqimorë të të sëmurëve. BoldNews.al ka hulumtuar dhjetëra dokumente, prokuruese por edhe raporte të Kontrollit të Lartë të Shtetit, që tregojnë se kjo dyshe ka abuzuar me këto ushqime.
Sipas dokumenteve që disponon BoldNews.al, Spitali “Nënë Tereza” hapi në muajin mars 2023 tenderin me objekt “shërbim gatimi dhe shpërndarje ushqimi”, për Qendrën Spitalore Universitare “Nënë Tereza”. Fondi limit i këtij tenderi ka qenë 696.538.696 lekë pa TVSH, ose me TVSH rreth 7 milionë euro. Mësohet se kohëzgjatja e kontratës marrëveshjes kuadër ose afati për zbatimin e saj do të jetë brenda afatit 48 muaj nga lidhja e marrëveshjes kuadër. Në dokumentin e mësipërm, drejtoresha e QSUT-së shkruan se arsyet e anulimit të kësaj procedure kanë qenë se “nuk u paraqit asnjë ofertë e përshtatshme”. Pra, e theksojnë e përshtatshme, ndërsa ka dyshime se gjithçka po bëhet për t’i rritur vlerën kësaj procedure. Duke qenë se kriteret janë bërë me “punë të ngjashme”, kaq e aq punëtorë, me përvojë të gjatë, firma që i plotëson kushtet është “KPL”. Edhe më parë, kjo firmë ka qenë fituesja e këtij tenderi, duke “garuar” edhe me veten.
Por kush qëndron pas firmës “KPL”?! Në vitin 2019, QSUT ka finalizuar tenderin e ushqimeve për pacientët. Shërbimi ka pasur një vlerë prej 7.4 miliardë lekë, tender i cili i është dhënë kompanisë KPL sh.p.k. e cila ka garuar e vetme. Sipas të dhënave të Qendrës Kombëtare të Biznesit, kjo firmë ka pasur emrin “Avanca_1” dhe “So.Ri”. Më parë pronar dhe administrator ka qenë z. Nikolin Jaka, biznesmen. Më pas, Jaka ia shiti aksionet znj Alma Tafani, bahkëshortes së tij. Kjo e fundit, nëpërmjet disa transaksioneve ia shiti aksionet z. Ramazan Troka, i cili është “me letra” pronar i fundit!
Në vitin 2019, “KPL”-ja fiton tenderin e majmë nga QSUT, me vlerë 829 milionë lekë të rinj. Ky tender është bërë objekt i një kontrolli nga KLSH-ja, e cila ka evidentuar disa problematika. “Në datën 26 mars 2019 është lidhur drafti i marrëveshjes kuadër, midis QSUT-së dhe OE ‘KPL’ shpk për lidhjen e kontratës së
shërbimit me objekt ‘shërbim gatimi dhe shpërndarje ushqimi për QSUNT’ me afat 48 muaj. Vlera është në total 744.358.551 lekë pa tvsh dhe 892.601.681 lekë me TVSH” thuhet në raport.
KLSH shkruan se, sipas kontratës, kontraktori përgatit ushqimin në mënyrë të përqendruar në kuzhinë çdo ditë në bazë të numrit të të shtruarve, bazuar në përcaktimet e dietave të kartelës së pacientit, vënë në dispozicion nga mjeku përkatës dhe konfirmuar nga mjeku dietolog, si dhe të personelit mjekësor që është në shërbim 24 orë. “Nga auditimi rezulton se, që prej hyrjes në fuqi të kësaj kontrate, përgjegjësitë e specialistit dietolog në monitorimin e kësaj kontrate (referuar përgjegjësive të veçanta të parashikuara në, është kryer nga SMSHK, pra duke konfirmuar menytë javore e duke ndjekur e monitoruar dietat e veçanta, realizimin te pacientët dhe te stafi, si dhe kënaqësinë nga shërbimi. Sa më sipër, zbatimi dhe monitorimi i kësaj kontrate nuk mund të jetë i plotë në mungesë të mjekut dietolog, për shkaqet e sipërpërmendura. QSUNT të shqyrtojë arsyet e dështimit të procedurave të rekrutimit për vakancën ‘Specialist/ Dietolog’” thuhet në këtë raport. Ka dyshime se vakanca është bërë me dashje, duke favorizuar firmën fituese të këtij tenderi.
