Dy kallëzime penale kanë vënë në lëvizje Prokurorinë e Posaçme Anti Korrupsion për ish-kreun e Bashkisë Durrës, Vangjush Dako, hetime që u përmbyllën me arrestimin e tij dhe 9 personave të tjerë.
Sipas dosjes hetimore, kundër ish-kryebashkiakut dhe 9 ish-zyrtarëve e biznesmenëve, ku Prokuroria e Posaçme i akuzon për shpërdorim detyre dhe falsifikim të dokumenteve.
Kallëzimi i parë është bërë nga banorët e një pallati në lagjen numër 5, godinë e cila u bë e pabanueshme pas tërmetit të vitit 2019. Sipas banorëve leja e ndërtimit ishte dhënë në kundërshtim me ligjin, pasi pallati përfundoi me 4 kate shtesë.
Sipas SPAK, rezulton se “personat nën hetim Ermal Imma, Fatmir Ejupi, Meri Priftuli, Adrian Bulku, Adhurim Qchajaj, dhe Figiri Farruku, në saj të pozicionit që ata kanë mbajtur, në bashkëpunim midis tyre dhe me të ndjerin Shaban Karuli, nëpërmjet hartimit dhe nënshkrimit të dokumentacionit tekniko-ligjor të ndërtimit, duke paraqitur të dhëna të rreme në lidhje me kohën kur këto veprime janë bërë, pasi janë bërë mbi dy vjet pas përfundimit të plotë të objektit, me ndërhyrje dhe vullnet i kanë falsifikuar këto dokumente, si për kohen kur ato janë bërë, por dhe për thelbin e përmbajtjes se tyre, kane konsumuar elementët e veprës penale të ‘Falsifikimit të vulave, stampave dhe formulave’ e kryer ne formën e falsifikimit të formularëve”.
Po kështu, sipas prokurorisë në, “rezulton se personat nën hetim Vangjush Dako dhe Adhurim Qehajaj, nëpërmjet zbardhjes (nënshkrimit apo protokollimit) së vendimit për miratimin e destinacionit të sheshit të ndërtimit, nëpërmjet nënshkrimit dhe protokollimit të formularit që pasqyron ketë fakt, dhe nëpërmjet zbardhjes (nënshkrimit dhe protokollimit) te vendimit për miratimin e lejes së ndërtimit, datë 14 Tetor 2014, dy vjet pasi objekti kishte përfunduar së ndërtuari, fakt ky për të cilin ishin vënë në dijeni më parë dhe nga Inspektimi i Inspektoratit Urbanistik Vendor, në kundërshtim me dispozitat e Ligjit ‘Për planifikimin e territorit i ndryshuar’, jo vetëm që nuk kanë marre masa për mbrojtjen e territorit, por i kane kryer këto veprime, me qëllim për të legalizuar ndërtimin e paligjshëm dhe duke i hapur rrugë regjistrimit në regjistrat e pasurive te paluajtshme”.
Këto veprime, vlerëson SPAK, janë kryer duke shpërdoruar kompetencat e dhëna nga ligjit për Qeverisjen Vendore dhe duke i ushtruar ato në mënyre abuzive, duke konsumuar në këtë mënyre elementet e veprës penale të “Shpërdorimit ti detyrës”.
Kallëzimi i dytë është bërë nga ish-kreu i PD Durrës, Ferdinand Xhaferraj, sipas të cilit Dako shpërdoroi fondet publike për një rrugë që u tenderua por nuk u realizua. Padia e Xhaferrajt mbështetet edhe nga dy raporte të Kontrollit të Lartë të Shtetit, ku për projektin e rrugës së Plazhit nga Bërryli deri në Currila, i është shkaktuar një dëm buxhetit të shtetit në shumën 18 milionë lekë.
Sipas SPAK, Vangjush Dako, jo vetëm nuk ka marrë masa për Kontrollin e Komisionit të Llogaritjes së Fondit Limit, por ka miratuar dhe urdhrin e prokurimit me vlerën e propozuar nga ky komision, çka i është shkaktuar dëm shtetit në vlerën 18 milionë Lekë.
10 të akuzuarit dhe masat e sigurisë
Vangjush Dako, ish kryebashkiaku i Durrsësit. Akuza: Shpërdorim detyre 2 herë. Masa e sigurisë: Arrest me burg
Adhurim Qehajaj, ish drejtori i Urbanistikës së bashkisë së Durrësit. Akuza: Shpërdorim detyre dy herë dhe falsifikim të vulave, stampave dhe formularëve të kryer në formën e falsifikimi të formulave të miratuara nga personi që ka për detyrë hartimin e tyre dhe në bashkëpumin. Masa e sigurisë: Arrest me burg
Fiqiri Farruku, administrartor i firmës së ndërtimit Fakle Sh.p.k. Akuza: falsifikim të vulave, stampave dhe formularëve të kryer në formën e falsifikimi të formulave të miratuara nga personi që ka për detyrë hartimin e tyre dhe në bashkëpumin. Masa e sigurisë: Arrest me burg.
Ermal Lama, Akuza: Shpërdorim detyre dy herë dhe falsifikim të vulave, stampave dhe formularëve të kryer në formën e falsifikimi të formulave të miratuara nga personi që ka për detyrë hartimin e tyre dhe në bashkëpunim. Masa e sigurisë: Arrest me burg.
Fatmir Ejupi, Akuza: Shpërdorim detyre dy herë dhe falsifikim të vulave, stampave dhe formularëve të kryer në formën e falsifikimi të formulave të miratuara nga personi që ka për detyrë hartimin e tyre dhe në bashkëpunim. Masa e sigurisë: Arrest me burg.
Adrian Bulku, Akuza: Shpërdorim detyre dy herë dhe falsifikim të vulave, stampave dhe formularëve të kryer në formën e falsifikimi të formulave të miratuara nga personi që ka për detyrë hartimin e tyre dhe në bashkëpunim. Masa e sigurisë: Arrest me burg.
Adnand Toçila, Akuza: Shpërdorim detyre kryer në bashkëpunim. Masa e sigurisë: Arrest me burg.
Meri Selimi, Akuza: Shpërdorim detyre dy herë dhe falsifikim të vulave, stampave dhe formularëve të kryer në formën e falsifikimi të formulave të miratuara nga personi që ka për detyrë hartimin e tyre dhe në bashkëpunim. Masa e sigurisë: Arrest në shtëpi.
Ferzilet Hajdëri, Akuza: Shpërdorim detyre kryer në bashkëpunim. Masa e sigurisë: Arrest me shtëpi.
Diana Dedja, Akuza: Shpërdorim detyre kryer në bashkëpunim. Masa e sigurisë: Arrest me shtëpi.
