Kryeministri Edi Rama, nga Berati ku është ndalur në atë që e konsideron si “turi i falënderimeve” për zgjedhjet e 14 majit, ka komentuar arrestimin e Vangjush Dakos.
Rama u shpreh se nuk mund të ndjehet mirë kur shikon dikë që e ka pasur në krah dhe sot ka në krah avokatin. Megjithatë, shtoi se për herë të parë po goditen njerëz të lidhur me pushtetin. Për këtë, vijoi, “duhet të jemi ne krenarë për PS”.
“…Fola për hipotekën, ka plot gjëra të tjera që duhen adresuar dhe që nuk shkojnë, ashtu sikundër duhet bërë durim shumë i madh edhe në luftën kundër korrupsionit sepse kemi hyrë në një fazë komplet të re, ku për herë të parë në historinë e popullit tonë, po goditen njerëz të lidhur me pushtetin. Natyrisht, që kjo s’është e lehtë, natyrisht që këtu ka edhe gjëra që të bëjnë të ndihesh jo mire, qoftë për arsye se s’ke si ndihesh mirë kur shikon dikë që deri dje ka qenë krah teje dhe pastaj është në krah të avokatit e përballë prokurorit e gjykatësit, dhe me siguri diçka ka ndodhur, por edhe kur shikon se si mund të përdoret forca e pushtetit të drejtësisë për të bërë dhe gjëra që nuk shkojnë, por të gjitha këto janë pjesë e një procesi, janë pjesë e një historie të re dhe rruga është e përpjetë, nuk është dishezë në këtë drejtim, por ama keni parasysh që për herë të parë po ndodh kjo. Për herë të parë në historinë e popullit tonë, kurrë s’ka ndodhur më parë. E pra, për këtë duhet të jemi ne krenarë për Partinë Socialiste dhe do të jemi krenarë për të gjithë kontributin që japim”, tha Rama.
Dako u arrestua me urdhër të SPAK, ndërsa GJKKO kishte caktuar masën e sigurisë “arrest me burg” për ish-Kryebashkiakun e Durrësit dhe 9 persona të tjerë, kryesisht ish-punonjës të Bashkisë së qytetit bregdetar.
Vangjush Dako e drejtoi Bashkinë e Durrësit për 3 mandate deri në vitin 2019. Po në vitin 2019, Dako dhe familjarët e tij iu shtuan listës së zyrtarëve shqiptarë që nuk lejohen të hyjnë në territorin e Shteteve të Bashkuara të Amerikës.
Në vitin 2020, gjatë një interviste televizive, Rama u pyet nga gazetarët për akuzat që Departamenti Amerikan i Shtetit kishte për Dakon, por ai u përgjigj se nuk e dikton DASH-i miqësinë e tij. Madje Rama shtoi se edhe në rast se Dako do të përfundojë në burg, ai ka qenë, është dhe do të mbetet miku i tij.
“Nuk ma dikton mua miqësinë Departamenti i Shtetit. Unë Dakon e kam mik. Po e them këtu, sikur edhe në burg të shkojë Dako, ai është sërish miku im”, do të deklaronte Rama.