Avokati i Vangjush Dakos konfirmoi pas daljes nga Drejtoria e Policisë së Tiranës, ku mbahet ish-kryebashkiaku, se klienti i tij akuzohet për shpërdorim detyre.
“Sapo u ekzekutua vendimi i GJKKO që ka vendosur arrest me burg për zotin Dako. Akuza për shpërdorim detyra për 2 raste. Një grupi banorësh që pretendojnë se ka pasur shkelje në kolaudimit të objektit. Dhe një tjetër, një kallëzim i zotit Ferdinand Xhaferri në prag të zgjedhjeve të 2021”, tha avokati Petrit Ismaili për gazetarët.
Sipas tij, vendimi për masën e arrestit me burg është marrë nën trysninë e medias, politikës dhe ndërkombëtarëve. “Kam qenë në brendësi të çështjes për akuzën e parë. Paraprakisht deklaroj se Prokuroria e Posaçme nuk po mban dot ekuilibër nën trysnin mediatike, apo ndërkombëtarëve dhe po merr masa për mendimin tim të nxituara”, tha ai.
“Në momentin e arrestimin kam njoftuar unë policinë për vendndodhjen e Dakos. Dako ka qenë normal në Tiranë dhe kur kemi parë mediat që ka një masë kemi njoftuar autoritetet”, u shpreh avokati.
Sipas Ismailit, leja e ndërtimit për pallatin në fjalë është e rregullt: Bëhet fjalë për vendime kolegjiale jo vendime vetëm të Dakos. Unë di se bëhet fjalë për një pallat me leje ndërtimi të rregullt të dhënë nga bashkia”, tha avokati Petrit Ismaili.
I pyetur nga gazetarët nëse Dako ka probleme shëndetësore, avokati e mohoi diçka të tillë. “Nuk ka pasur probleme. Natyrisht pjesa emocionale, stresi e këto janë”.
Petrit Ismaili tha se ende nuk është njohur me detajet e hetimit, duke mos zbuluar hollësi të tjera.