Protesta në komunat veriore, Zveçan, Leposaviç dhe Zubin Potok, janë duke vazhduar edhe të shtunën e 3 qershorit.
Në Zveçan, sipas mediave në Kosovë, kryesisht në protestë janë duke marrë pjesë gratë që janë të punësuara në sektorin e edukimit dhe situate është e qetë.
Serbët lokalë janë duke protestuar rregullisht prej 26 majit në këto komuna, për të kundërshtuar hyrjen e kryetarëve të rinj shqiptarë në ndërtesat komunale. Këta të fundit u zgjodhën nga zgjedhjet e pjesshme të zhvilluara në këto komuna, që u bojkotuan nga përfaqësuesit politikë të e pakicës serbe.
Faktori ndërkombëtar ka bërë thirrje të vazhdueshme për marrjen e hapave drejt uljes së tensioneve.
Disa diplomatë kanë kërkuar edhe mbajtjen e zgjedhjeve të reja në veri.
Ndërkohë Prishtina zyrtare dhe Beogradi kanë akuzuar njeri-tjetrin lidhur me situatën e tensionuar në veri, ku në shumë raste protestuesit serbë kanë ushtruar edhe dhunë.
