Kryetari i Partisë Demokratike, Sali Berisha, denoncoi ditën e sotme nga selia blu fenomenin e votuesve shëtitës.
Në një deklaratë për mediat, Berisha sqaroi se votuesit shëtitës janë votues që tranzitohen për qëllime manipulimit të zgjedhjeve, dhe se ky fenomen u dyfishua në zgjedhjet e 14 Majit.
Berisha ka renditur numrin e votuesve në harkun e 3 zgjedhjeve të fundit. Zgjedhjet e përgjithshme të 2021, zgjedhjet e pjesshme të 6 marsit dhe ato të zgjedhjeve të 14 majit.
Berisha tha se zgjedhës potencialisht shëtitës në zgjedhjet e fundit janë rreth 547 mijë vetë në të gjithë vendin.
“Farsa zgjedhore kishte dimensionet e saj të shëmtuara. Njëri prej të cilëve janë edhe votuesit shëtitës. Ata u shfaqën si fantazma elektorale në zgjedhjet e 2015-s kur në një uzinë pa dyer dhe pa dritare, të braktisur prej vitesh në Kavajë ishin regjistruar si vendbanimi 300 zgjedhës ndërkohë që nuk kishte asnjë njeri.
Edhe në Durrës u gjetën votues të regjistruar në garazhe deri te shatërvani në qendër të qytetit si adresë. Ajo që dëshmon në përdorimin e fortë të këtij kontingjenti votues shëtitës ishte 6 marsi i vitit 2022. Ajo që ndodhi në qytetin e Durrësit është se numri i votuesve të paidentifikuar u dyfishua nga 5 mijë në 9600. Në këtë qytet 3900 emigrantë që rezultonin se kishin votuar, asnjë prej tyre nuk kishte ardhur në Shqipëri.
Në këto zgjedhje kemi dokumente se ky fenomen u shumëfishua. Fenomeni i votuesve shëtitës është një fenomen i cili po studiohet me intensitet nga PD. Ne kemi identifikuar se zgjedhës potencialisht shëtitës janë në të gjithë vendin. Loja apo manovra me listat e zgjedhësve është bërë në përjashtimin e mbi 180 mijë zgjedhësve nga votimi duke u ndryshuar qendrat e votimit”, deklaroi Berisha.
