Një aksident me dy të plagosur ka ndodhur reth orës 09:45 të kësaj të Marte në aksin rrugor Gjirokastër-Jorgucat.
Policia njoftoi se në vendin e quajtur “Kryqëzimi i Jorgucatit”, janë përplasur dy automjete me drejtues shtetasit K. S., 28 vjeç, banues në Delvinë dhe N. T., 58 vjeç, banues në Gjirokastër.
Për pasojë, kanë mbetur të dëmtuar të dy drejtuesit e mjeteve, si dhe pasagjerja A. S., rreth 20 vjeçe, e cila ndodhej në automjetin që drejtohej nga K. S.
Të dëmtuarit u transportuan në spital për të marrë ndihmën mjekësore dhe raportohet se ndodhen jashtë rrezikut për jetën.
Një hetim ka nisur për zbardhjen e shkaqeve të aksidentit.
