Presidenti Bajram Begaj dekretoi projektligjin e kaluar nga parlamenti gjatë seancës së të enjtes, që rriti me disa herë pagën e kreut të shtetit, kryeministrit, ministrave, deputetëve dhe disa zyrtarëve të tjerë politikë. Dekreti i firmosur mban datën e kësaj të Hënë – 28 Maj, 2023.
Për miratimin e projektligjit të shumëdebatuar, votat më shumicën e deputetëve të mazhorancës i bashkuar edhe disa prej atyre të opozitës. Në thelb, projektligji parashikon një rritje të konsiderueshme pagash për ligjvënëset, kryeministrin dhe Presidentin, ndërsa më shumë se 50 herë më pak për disa kategori të administratës publike.
Konkretisht, rroga e mësuesit rritet me 25 euro në muaj, ajo e infermierit me 23 euro në muaj, mjekut dhe policit po ashtu. Ndërsa për deputetët dyfishohet, nga 157.000 lekë shkon në 310.250 lekë. Ministrat do të paguhen 318.750 lekë nga 175.000 lekë, kryetari i Kuvendit 393.125 lekë nga 229.000 lekë, zv.kryeministri 330.000 lekë nga 187.000 lekë që merrte më herët. Paga e kryeministrit rritet në 393.125 lekë nga 228.000 lekë. Presidenti ndërkohë do të paguhet 425.000 lekë në muaj nga 257.000 lekë që merr aktualisht.
Projektligji mori kritika të shumta nga kundërshtarë të nismës që e cilësuan thellim të mëtejshëm të hendekut mes qeveritarëve, deputetëve dhe qytetarëve të thjeshtë.
Nga ana tjetër, shqetësim për rritjen e pagave shprehën dhe ekspertë të ekonomisë, që problemin e shohin te financat për këtë projektligj. Sipas tyre, rritja e pagave mund të sjellë rritje të borxhit publik, më pak investime publike dhe rritje taksash. Qeveria ndërkohë, ende nuk ka sqaruar burimin e fondeve që do të mbulojë shpenzimet e rritjes së pagave.
