Ministrja për Evropën dhe Punët e Jashtme, Olta Xhaçka, ka marrë pjesë këtë të Premte në takimin informal të Këshillit të Sigurimit, në Shtetet e Bashkuara të Amerikës, mbi Sigurinë Kibernetike.
Gjatë fjalës së saj Ministrja u shpreh se sulmet kibernetike që goditën Shqipërinë pak kohë më parë, janë orkestruar dhe sponsorizuar nga Irani, ndërsa theksoi se sulmi tentoi që të shkatërronte të dhëna shtetërore, por nuk ia dolën dot.
Sipas Xhaçkës, Shqipëria ka ndërtuar gradualisht një shoqëri dixhitale në rritje, dhe ja doli të frenojë dëmin nga sulmi kibernetik.
Xhaçka: Vetëm këtë vit, më shumë se dyzet sulme kibernetike kanë prekur 19 vende. Sulmi kibernetik në Shqipëri, kemi prova të padiskutueshme se u orkestrua dhe u sponsorizua nga Irani. Dëmi u frenua, por ishte një dëshmi e brutalitetit të aktivitetit keqdashës kibernetik.
Akte të tilla përbëjnë një kërcënim për paqen dhe sigurinë ndërkombëtare dhe duhet të trajtohen si të tilla. Veprimet e Rusisë kanë shkaktuar bllokime në komunikim jo vetëm në Ukrainë, por edhe në pjesë të tjera të Evropës. Vendet e Ballkanit Perëndimor janë shënjestruar sistematikisht nëpërmjet fushatave të manipulimit të informacionit. E gjitha kjo për të shkaktuar paqëndrueshmëri politike dhe për të minuar aspiratat e tyre euro-atlantike.
Koreja e Veriut është bërë po ashtu një shembull famëkeq i aktiviteteve të përsëritura keqdashëse. Të gjitha shtetet anëtare janë të detyruara të respektojnë Kartën e OKB. Duhet të promovojmë një hapësirë kibernetike globale, të hapur, të qëndrueshme dhe të sigurt.
Ne të gjithë kemi një rol për të luajtur, dhe ai fillon me vendosjen dhe respektimin e rregullave të pranuara së bashku’.
