Ministrja e Financave, Delina Ibrahimaj, e pyetur nga mediat nëse ishte dakord me koeficentët e pagave të miratuara për deputetët dhe kabinetin qeveritar në Komisionin e Ekonomisë tha se janë ligjvënësit ata që vendosin.
Sipas ministres, reforma e pagave po bëhet për të gjithë administratën sepse ekonomia e vendit po ecën më ritme të mira dhe se rritja e pagave të deputetëve nuk sjell vështirësi për buxhetin.
“Janë deputetët, janë ligjvënësit. Pra nuk kam asnjë koment. Nuk vihet në vështirësi buxheti i shtetit pasi numri i përfituesve, deputetët, kabineti qeveritar është një numër shumë i vogël. Këtu bëhet fjalë për reformimin e sistemit të pagave të gjithë administratës publike dhe buxheti i shtetit ka aftësitë dhe kapacitetin për ta përballuar atë”, tha ajo.
Sipas ndryshimeve që u miratuan në Komisionin e Ekonomisë, pagat e deputetëve dhe ato të ministrave do të llogariten me koeficientin 0.73 në një hierarki që nis me pagën e Presidentit të Republikës.
Me koeficientin e ri, pagat e deputeteve dhe ministrave gati dyfishohen pra shkojnë në 310 -319 mijë Lekë nga 175 mijë që janë aktualisht. Paga mujore e presidentit bëhet 425 mijë, ndërsa ajo e kryeministrit dhe kryetarit të parlamentit arrin në 392 mijë Lekë në muaj.
Mbetet për të parë nëse këto ndryshime do të miratohen të enjten në Kuvend. Aty pritet që veç rritjes së pagave të deputetëve pritet të miratohet edhe projektligji për reformën e pagave për më shumë se 130 mijë punonjësve të administratës publike.
