Deputeti i Partisë Demokratike, Flamur Noka deklaroi pasi doli nga SPAK se ishte në Prokurorinë e Posaçme për dy çështje të cilat i etiketoi si “batërdi zgjedhore”.
Noka tha se PD ka bërë një mori padish në SPAK, teksa sot u thirr për dy çështje, atë të kryebashkiakes së Roskovecit Majlinda Bufi dhe për aplikacionin Aktivisti. Për këto dy denoncime, Noka tha se ka hetim penal.
Sipas Nokës, Majlinda Bufi ka shantazhuar qytetarët dhe ka përdorur burimet e administratës për të manipuluar rezultatin e zgjedhjeve të 14 majit. Ndërsa për aplikacionin “Aktivisti”, Noka theksoi se ishte një survejim që iu bë administratës me qëllim presioni për të marrë votën.
“Siç jeni në dijeni në këtë fushatë zgjedhore, Rilindja ka bërë një batërdi dhe në këtë aspekt, ne kemi monitoruar dhe kemi paraqitur në SPAK një mori padish për këtë batërdi. Sot isha për të diskutuar në lidhje me dy çështje. Në lidhje me zonjën Majlinda Bufi si kërcënuese, shantazhuese e qytetarëve për t’u devijuar me dhunë votën dhe për të famshmen çështjen të Aktivistit, që po ashtu shantazhonte dhe survejonte administratën. Këto të dyja janë krime të rënda zgjedhore dhe ne do i shkojmë deri në fund. Të gjitha provat që disponojmë janë dorëzuar dhe çdo dokument që do kemi, do e dorëzojmë. Fakti që jam këtu do të thotë se hetim penal ka për zonjën Bufi dhe çështjen e Aktivistit. Vota me presion duhet të marrë fund, vota duhet të jetë e lirë, regjim nuk mund të pranojë Shqipëria. Këtu duhet të zhvillohen zgjedhje të lira dhe të ndershme, qytetari duhet të jetë objkektiv dhe jo i dhunuar dhe i blerë me vullnetin e tij”, tha Noka.
