Të dielën e parë votuan Edi Ramën sot betohen për qëndresë, shakaja ska fund nga banorët e Bërxullës.
Njëzëri ata kanë kërkuar një përgjigje nga qeveria se çfarë do të bëhet me pronat dhe tokat e tyre, të cilat preken nga ndërtimi i projektit të rrugës Thumanë-Kashar. Banorët kërkojnë shpronësim me vlerën e tregut, po ashtu dhe një ndërtim të një nënkalimi për ta, si një rrugë alternative.
“Ne jemi akoma në qiell të hapur, nuk kemi informacion. jemi ne stres dhe ankth, s’dimë ku të shkojmë nesër. Shteti nuk na jep një zgjidhje”, tha administratori i këtij fshati.
Gjithashtu banorët i kanë bërë thirrje kryeministrit Edi Rama që po t’i ketë ngelur pak dinjitet, mos e hedhë popullin në rrugë.
“Prona është e shenjtë, ato nuk po e cajnë kokën fare. Është fatkeqësi më e madhe. I bëj thirrje kryeministrit nëse i ka mbetur pak dinjitet të mos ta hedhë këtë popull në rrugë. Do ta mbrojmë se është e ardhja e fëmijëve tanë. Do mbetemi rrugëve“- tha një prej banorëve.
Ata shprehen se kanë kërkuar ballafaqim me kryeministrin Edi Rama dhe ministren e Infrastrukturës Belinda Balluku por nuk kanë marrë asnjë përgjigje prej tyre.
“Ne jemi të pambrojtur. Shteti nuk na jep zgjidhje. I bëj thirrje kryeministrit dhe ministres së Infrastrukturës. I kemi kërkuar dialog disa herë, nuk kanë pranuar të vijnë të diskutojmë. I bëj thirrje të vijnë të prezantojnë planin për këta banorë, pronat dhe banesat tona.
Kemi pasur komunikim me Kadastrën por nuk na ka dhënë zgjidhje të plotë. Pasi tha se ishin bllokuar veprimet për shkak të fushatës. Duhet të jenë zhbllokuar tani se fushata mbaroi, zgjedhjet u krynë dhe ata duhet të fillojnë me certifikimin e pronave dhe banesave. Duhet të na jepet zgjidhje siç e parashikon ligji. Pronat të dëmshpërblehen me vlerën e tregut. Duke parë pasojat që na dha tërmeti. I bëj thirrje shtetit të vendosë çmim të drejtë dhe të saktë për të gjitha banesat sepse nesër njerëzit do ngelen në qiell të hapur. Të mblidhen këshillat bashkiakë, MiE dhe të vendosë mbi trojet ku do ndërtohen këto banesa që i prek ky segment rruge”, tha ai.
Ndërkohë, një tjetër banor iu bëri thirrje bashkëfshatarëve të tij që mos të shiten, por të mbrojnë pronat e tyre.
“Janë këta oligarkët shqiptarë që kërkojnë të ndërtojnë, autostrada, rrugë, në kurriz të pronave tona. I bëj thirrje për dialog qeverisë. Ne jemi ata pronarë që po na rrëmbehet prona. Nuk mund të vendosin sekserët çmimet e pronave tona. I bëj thirrje kryeministrit që të reagojë dhe të na dëgjojë. Prona sa e shtrenjtë është dhe e shenjtë. Jam i vendosur që deri në frymë të fundit, do t’i mbrojmë me gjak. S’do dal më në protestë, por do të rri në banesën time dhe do e mbrojë atë. I bëj thirrje banorëve që të mos shiten, prona është e shenjtë”, tha pronari.
- Banorët e Bërxullës prej 9 muajsh në protestë
Banorët e Bërxullës prej 9 muajsh kundërshtojnë projektin e zgjerimit të aksit rrugor ‘Thumanë-Kashar’ i cili prek banesat e tyre.
Kjo nuk është protesta e parë që ndodh nga banorët e kësaj zonë lidhur me këtë shqetësim, pasi ata nuk janë dakord me skemën e shpronësimit të pronave të tyre që preken nga projekti i rrugës. Sipas tyre, çmimi i tregut për pronat e tyre është rreth 50 euro për metër katror, ndërsa atyre u është ofruar një kompensim me rreth 4 euro për metër katror, gjë që ata e kanë refuzuar kategorikisht.
Edhe këtë të dielë, ata paralajmëruan përshkallëzim të protestës nëse kërkesat e tyre nuk marrin përgjigje, ndërkohë kujtojmë që më herët kanë paralajmëruar se nuk ju jepet një përgjigje, do ta zgjidhin me vetëgjyqësi.
