Kryetari i Partisë Demokratike, Sali Berisha pritet të shkojë në votëbesim pas humbjes së zgjedhjeve të 14 majit.
Këtë e konfirmoi edhe deputeti demokrat Flamur Noka këtë të enjte. “Pas zgjedhjeve lokale, votëbesim. Sigurisht që do të reflektojmë”, tha Noka në një emision televiziv.
Më tej, ai përsëriti edhe qëndrimin që ka mbajtur edhe kryetari i PD-së Berisha dhe eksponentët e tjerë se zgjedhjet u manipuluan dhe blenë masivisht nga pushteti.
“Është bërë vota mall, si të blesh votën – si të blesh këpucën. Kemi thënë një gjë: Me Edi Ramën në Shqipëri, zgjedhje të lira nuk ka. Armiku i votës së lirë është Edi Rama. Por ne kemi thënë që bojkot nuk bëjmë. Nuk kemi pasur kurrë iluzion. Ne nuk heshtim. Nuk janë vjedhur votat, janë blerë. Mos e gjeni të keqen te opozita. Si ta mbrojmë votën? Me kallash? Para bandave në Shkodër”, tha Noka në përgjigje të kritikave të analistëve në studion e emisionit “Të Paekspozuarit” për rezultatin humbës që opozita mori në lokalet e 14 majit.
Aplikimin e votëbesimit në rast të humbjes së zgjedhjeve, Berisha e ka lajmëruar para zgjedhjeve lokale.
“Treni, opozita shqiptare nuk ndalet. Për sa kohë ata që formojnë opozitën do më votojnë mua, se është një moment në statut rivotimi. Pa diskutim, statuti do zbatohet pikë për pikë. Pa diskutim do shkoj në votëbesim. Do zbatohet me përpikmëri të madhe. Nuk ka më statut në dorën e kryetarit, ai do zbatohet në mënyrë automatike”, tha Berisha në një emision televiziv më 4 maj.
