Kreu i Partisë Demokratike, Sali Berisha vijoi të sulmojë kryeministrin Edi Rama për të cilin tha se me mekanizmat e qeverisë manipuloi votën e qytetarëve.
Berisha e cilësoi 14 majin si një “farsë të madhe elektorale”, ndërsa denoncoi se mbi 200 mijë qytetarëve iu ishte transferuar qendra e votimit dhe për pasojë kjo solli pjesëmarrjen e ulët në zgjedhje.
Berisha denoncoi se në këto zgjedhje u rikthye nga pushteti loja me listat e votimit, ku sipas tij mbi 200 mijë qytetarëve iu ishte transferuar qendra e votimit, pa u pyetur.
“Farsa elektorale, e majit të 2023 dallon nga të gjitha farsat e zhvilluara nga Edi Rama si në proporcione ashtu dhe në cilësi. Thashë dallon në proporcione. Ajo është denoncuar nga mediat shqiptare, ndërkombëtare dhe institucionet ndërkombëtare. Por në këtë farsë, si kurrë më parë, ndërhyrja ishte e përmasave të tmerrshme, saqë rrëzoi euron, monedhën më të rëndësishme në nivelet që s’i kishte përjetuar më parë. Ky është tipar i industrisë mafioze shtetërore të blerjes së votës. Por farsa elektorale e majit të 2013 (2023) gërshetoi në mënyrë më të shpëtuar dy stile, stilin e narko-shtetit dhe mafies së tij me stilin Putin, i cili parakupton përdorimin e të gjitha mjeteve të shtetit për kontrollin dhe ndryshimin e rezultatit. Në këto zgjedhje, u rikthye me të gjithë pasojat dhe shëmtinë e tij loja me listat e votimit, përjashtimi i zgjedhësve nga qendrat e votimit. PD e denoncoi aktin kriminal të Ramës dhe ministrit të familjes së tij, Cuçi, që ndryshoi qendrat e votimit të 1mln 300 mijë nxënësve. PD e denoncoi këtë akt si përpjekje brutale. Dita e votimit, ishte dita e përjashtimit të mbi 200 mijë zgjedhësve shqiptarë, ku qendrat e votimit ishin transferuar në qytete të tjera, pa asnjë paralajmërim. KQZ tha se nuk votuan dot 180 mijë shqiptarë”, tha Berisha.
Berisha u shpreh se Basha dhe Alibeaj janë të larguar përfundimisht nga Partia Demokratike, teksa akuzoi këtë të fundit se mori një shpërblim 220 mijë euro nga Rama për shërbimin e bërë në zgjedhje.
“Qëndrimi im është ky dhe i Partisë. Dy persona janë të larguar nga PD-ja përfundimisht njëri është Lul Brava tjetri është Alibasha, i cili vetëm sot mori shpërblim nga Rama 220 mijë euro. Ne jemi të hapur për të gjithë të tjerët, për debat dhe negociata, për çfarë të duan, por këta dy persona, pengje të Edi Ramës u përdorën në mënyrën më të pamëshirë nga ai për të goditur opozitën. Iu bëj thirrje që të lexoni rezultatet me realizëm. PD-së iu mohua logoja, kryetari i koalicionit. Kur ringu ishte përgatitur për ndeshje, me mekanizma ala-Putin shpalli veten fitimtar, duke mos lënë kundërshtarin që të hyjë në ring. Po kjo nuk është fitore”, u shpreh Berisha.
