Një pako e dyshimtë e skanuar në godinën e Kargos në Aeroportin e Rinasit ka ngritur në këmbë përfaqësuesit e sigurisë atje dhe Policinë e Shtetit. Njësia Antieksploziv e Repartit Special RENEA dhe Drejtoria e Antiterrorit, të mbështetura nga shërbimet e tjera kanë shkuar menjëherë.
Janë kryer të gjitha veprimet procedurale për sigurinë e shtetasve që ndodheshin në këto ambiente apo pranë tyre dhe janë kryer veprimet e shpejta ekzaminuese nga Njësitë policore të mësipërme.
“Nga veprimet e shpejta ekzaminuese, të kryera nga Njësia Antieksploziv e Repartit Special RENEA, në bashkëpunim me shërbimet e Komisariatit të Policisë Kufitare Rinas, Forcat e Ndërhyrjes së Shpejtë dhe ato të Drejtorisë së Antiterrorit, rezultoi se pakoja nuk kishte probleme”, thotë Policia.
Grupi hetimor vijon veprimet verifikuese, me qëllim dokumentimin e plotë ligjor të këtij rasti.
