Kandidati i koalicionit opozitar “Bashkë Fitojmë” për Bashkinë e Kuçovës, në zgjedhjet e 14 Majit, Lefter Maliqi, nuk e ka pranuar rezultatin.
Përmes një postimi në rrjete sociale, Maliqi shkruan se procesi ishte manipulim i hapur, dhe rezultati u tjetërsua në moment të fundit.
Në fillim të procesit të numërimit, Maliqi tregon se ishte në avantazh, dhe në mesditë KZAZ u largua nga qendra duke i lënë kutitë në mëshirë të fatit, për ta çuar më vonë Maliqin rreth 500 vota prapa krahasuar me kundërshtarin e tij socialist.
Maliqi u shpreh se ka vënë në dijeni për të gjitha këto shkelje edhe OSBE/ODIHR-in, ndërsa thotë se nuk do të tërhiqet derisa të largojë të korruptuarit.
Reagimi i plotë:
Mbështetësit e shumtë të betejës time: Nuk tërhiqem!
Bashkinë do t’jua kthejmë qytetarëve, nuk njoh humbjen pasi vota u tjetërsua në moment të fundit. Ishit të gjithë dëshmitarë të avantazhit tim. Çfarë ndodhi në fund? Përse u largua KZAZ nga ora 11:30 – 12:30 duke i lënë kutitë e votimit në mëshirë të fatit në një ndërtesë me dyer të brendëshme lidhëse me ndërtesën e shkollës ngjitur. Tavolina Nr. 5 e numërimit ishte e pa trasmetuar në kamera. Përse pati tension dhe zhurëm të patolerueshme gjatë numërimit? Përse u hodh kudo “çakull elektoral”? Përse u dynd i gjithë shteti në Kuçovë duke shkaktuar nje presion të jashtëzakonshëm në votuesit për rreth një muaj, duke ndikuar në rezultat psikologjikisht dhe jo vetëm! Përse fikeshin dritat natën në lagje e fshat duke shkakruar një spektakël makinash luksoze si rrallë herë! Përse lëvizej me polici duke blerë e shantazhuar votuesit! Përse krijuan inskenime një natë përpara ku shoqeruan vetëm të tanët në policinë e Beratit, gjoja verifikim kur mund të bëhej edhe në komisariatin e Kuçovës! Përse vinin makinat e policisë nga Berati dhe Tirana në Kuçovë! Përse Oligarku Pëllumb Salillari çdo ditë në Kuçovë në të gjitha bizneset e Kuçovës duke influencuar e mikluar! Prezenca e tij si rrallë herë në fshat e qytet në takime të fshehta duke nderruar makinat është një provë e patjetërsueshme që po bliheshin njerëz! E vërteta do të zbardhet shumë shpejtë! Hajdutët do të ndëshkohen! Ne fituam moralisht! Fituam kundër shtetit të kapur! Ligjërisht do ta marim bashkinë dhe do ta kthejmë në “Kantier Ndërtimi”!
Mirënjohje për të gjitha mediat që pasqyruan pa censurë aktivitetet, në mënyrë të veçantë profesionistët e medias, Rezear Xhaxhiu, Arjan Curri dhe gjithë analistët e e drejtë.
